जितसँगै पाकिस्तान बाहिरियो, न्युजिल्यान्ड सेमिफाइनलमा

एजेन्सी- आइसिसी एकदिवसीय विश्वकप क्रिकेटमा पाकिस्तानले सुखद अन्त्य गरेपनि सकिफाइनलमा भने पुग्न सकेन । लिगको अन्तिम खेलमा चमत्कारी जितको खोजीमा रहेको पाकिस्तानले बंगलादेशलाई ९४ रनले मात्र पराजति गर्न सक्दा प्रतियोगिताबाट बाहिरिएको हो । 

प्रतियोगितामा सेमिफाइनल प्रवेशको अंक गणितिय सम्भावाना राखेको पाकिस्तानले फराकिलो जित ननिकाल्दा न्युजिल्यान्ड सेमिफाइनलमा प्रवेश गर्यो । पाकिस्तान र न्युजिल्यान्डको समान ११-११ अंक भएपनि न्युजिल्यान्ड रनरेटका आधारमा अघिल्लो चरण प्रवेश गरेको हो । 

योसँगै प्रतियोगितामा अष्ट्रेलिया, भारत, इङ्ल्यान्ड र न्युजिल्यान्डले सेमिफाइनलमा स्थान बनाएका छन् । पाकिस्तानले दिएको ३१६ रनको विशाल लक्ष्य पछ्याएको बंगलादेशले ४४.१ ओभरमा सबै विकेट गुमाउँदै मात्र २२१ रन बनायो । 

बंगलादेशका लागि शाकिब अल हशनले ७७ बलमा ६ चौकाको मद्दतमा ६४ रनको अर्धसतकीय पारी खेले । त्यस्तै बंगलादेशका लिटोन दासले ३२ रन जोड्दा मोहम्मद उल्लाहले २९ रन बनाए । 

बलिङतर्फ पाकिस्तानका शाह अफ्रीदीले सर्वाधिक ६ विकेट लिए । त्यस्तै शाहब खानले दुई विकेट लिँदा वहाव रिज र मोहम्मद आमिरले समान एक-एक विकेट लिए ।

यसअघि टस जितेर पहिले ब्याटिङ गरेको पाकिस्तानले निर्धारित ५० ओभरमा ९ विकेट गुमाउँदै ३१५ रन बनाएको थियो । पाकिस्तानका लागि इमामले १०० बलमा ७ चौकाको सहयोगमा १०० रन बनाए । यस्तै बाबरले ९८ बलमा ११ चौकाको सहयोगमा ९६ रनको योगदान गरे । 

पाकिस्तनका इमाद वशिमले ४३ रन जोड्दा मोहम्मद हाफिजले २७ रन बनाए । बलिङतर्फ बंगलादेशका लागि मुस्ताफिजुर रहेमानले पाँच, मोहम्मद सैफदुनले तीन विकेट लिँदा मेहेन्दी हशनले एक विकेट लिए ।