एमालेमै फर्के '१० भाइ', स्थायी कमिटी बैठकमा सहभागी

काठमाडौं– नेकपा (एमाले) का अध्यक्ष केपी ओलीसँग असहमति जनाएर माधवकुमार नेपाल समूहमा रहेका १० जना स्थायी कमिटी सदस्यहरु औपचारिक रुपमै ओलीतिर फर्किएका छन्। 

आज मंगलबार दिउँसो च्यासलस्थित तुलसीलाल अमात्य स्मृति प्रतिष्ठानमा भएको स्थायी कमिटी बैठकमा उनीहरू सहभागी भएका छन्। नेपाल नयाँ पार्टी दर्ताका लागि निर्वाचन आयोगमा आवेदन दिएर आधिकारिकताको पर्खाइमा रहेका बेला उनीनिकट रहँदै आएका १० जना स्थायी कमिटी सदस्य ओलीतिरै फर्किएका हुन्।  

नेपालको साथ छाडेर मूलधारमै फर्किनेमा भीम रावल, अष्टलक्ष्मी शाक्य, युवराज ज्ञवाली, अमृत बोहोरा, योगेश भट्टराई, गोकर्ण बिष्ट, घनश्याम भुसाल, भीम आचार्य, सुरेन्द्र पाण्डे र रघुजी पन्त छन्। नेपालले नयाँ पार्टी दर्ताका लागि आयोगमा आवेदन दिँदा उनीहरुले साथ दिएका थिएनन्। नेपाल समूहले सोमबार आयोजना गरेको ‘चन्द्रागिरी नाइटआउट’ मा पनि उनीहरु सहभागी भएनन्। 

यसअघि उनीहरू ओलीले बोलाएको स्थायी कमिटी बैठकमा अनुपस्थित हुँदै आएका थिए र ओलीको आलोचना गर्दै आएका थिए। नेपालले नयाँ पार्टी दर्ताको आवेदन दिएकै दिन उनीहरुले अध्यक्ष ओलीको निवास बालकोट पुगेर १० बुँदे सम्झौता कार्यान्वयनको सहमति गरेका थिए।