किशोरीको बलात्कारपछि हत्या आरोपमा एक जना पक्राउ

पोखरा- कास्कीको मादी गाउँपालिका मकैखोलाकी एक किशोरीलाई बलात्कारपछि हत्या गरेको आरोपमा प्रहरीले एक जनालाई पक्राउ गरेको छ। जिल्ला प्रहरी कार्यालय कास्कीले १८ वर्षीया कोपिला परियारको बलात्कारपछि हत्या गरेको आरोपमा स्याङ्जाको हरिनास गाउँपालिका-६ चालिसेका मोटे भन्ने रामबहादुर थापालाई पक्राउ गरेको हो।

उनको वास्तविक नाम भने खड्कबहादुर खवास रहेको कास्की प्रहरी प्रवक्ता सुवास हमालले जानकारी दिए। फरार रहेका उनलाई १३ महिनापछि प्रहरीले पक्राउ गरेको हो।

अभिभावक बिहीन भएको अवस्थामा उनलाई कोपिला नेपाल नामक एक गैरसरकारी संस्थाले आश्रय दिएको थियो। सो समयमा उनी मानसिक रुपमा कमजोर थिइन्। केही वर्ष उक्त संस्थामा बसेर उनी मावलीतर्फको हजुरआमासँगै बस्दै आएकी थिइन्। 

गाउँमा विद्यालय निर्माणको काम गर्न आएका खड्बहादुरसँग उनको सम्बन्ध नजिकिएको थियो। प्रहरीलाई दिएको बयानमा उनले आफूहरूको सम्बन्ध नजिकिएको र विवाह गर्न दवाव दिएपछि उनकै सलले घाँटी कसेर हत्या गरेको बताएका थिए।

२०७७ साल असार १५ गते घरबाट हराएकी कोपिलाको शव असार २५ गते कुहिएको अवस्थामा फेला परेको थियो।