भलिबल : विभागीय टिम र प्रदेश ३ विजयी

बाँके- आठौं राष्ट्रिय खेलकुद प्रतियोगिताअन्तर्गत पुरुष भलिबलमा विभागीय टिम आर्मी , एपीएफ क्लब र प्रदेश नं. ३ विजयी भएका छन् । बाँकेको खजुरास्थित शुक्र भलिबल स्टेडियममा शुक्रबार भएको भलिबलतर्फको समूह ए मा भएको खेलमा आर्मीले गण्डकी प्रदेशलाई ३-१ को सेटमा पराजित गरेको छ । 

पहिलो सेट गुमाएको आर्मीले त्यसपछि उत्कृष्ट पुनरागमन गर्दै जित हात पारेको हो । आर्मीले पहिलो सेट २२-२५ ले गुमाएको थियो । त्यसपछि २५-१८, २५-२१ र २५-१४ को सेटमा गण्डकी प्रदेशलाई पराजित गर्दै नतिजा आफ्नो पक्षमा पारेको हो ।

त्यस्तै, समूह बी को खेलमा एपीएफ क्लबले प्रवेश पाँचलाई सोझो सेटमा पराजित गरेको छ । एपीएफले प्रदेश पाँचलाई २५-९, २५-७ र २५-१३ को स्कोरमा पराजित गरेको हो ।
आजै भएको महिलातर्फको खेलमा समूह ए को एपीएफ क्लबले प्रदेश १ लाई सोझो सेटमा हराउन सफल भयो । 

एपीएफले २५-४, २५-९ र २५-१० को सेटमा पराजित गरेको हो । त्यस्तै, महिलातर्फकै समूह बी को खेलमा प्रदेश ३ ले प्रदेश २ लाई सोझो सेटमा पराजित गरेको छ । प्रदेश तीनले प्रदेश दुई लाई २५-९, २५-७ र २५-१३ को सेटमा पराजित गरेको हो ।