बेन्जेमाको गोलले रियल हारबाट जोगियो

एजेन्सी- सोमबार राती भएको स्पेनिस ला लिग फुटबलमा करिम बेन्जेमाले गोल गरेपछि रियल मड्रिड हारबाट जोगिएको छ । पाहुना टोली रियलका लागि बेन्जेमाले गोल गरेपछि रियलले लेगानेससँग १-१ को बराबरी खेलेको हो ।

पहिलो हाफमा १-० गोल अन्तरले पछी परेको रियलका लागि बेन्जेमाले दोस्रो हाफमा एक गोल फर्काएका थिए । रियल पहिलो हाफको अन्तिम मिनेटमा खेलमा पछि परेको थियो । 

लेगानेसका जोनाथन सिल्भाले खेलको ४५ औं मिनेटमा गोल गरेपछि रियल पहिलो हाफमा १-० ले पछि परेको थियो । तर, दोस्रो हाफमा बेन्जेमाले गोल गर्दै खेल बराबरीमा ल्याए । उनले खेलको ५१ औं मिनेटमा बराबरी गोल फर्काएका थिए । 

करिम बेन्जिमाले पछिल्ला चार खेलमा पाँच गोल गर्ने क्रममा रियलका लागि बराबरी गोल फर्काएका थिए । बराबरीसँगै रियलले ३२ खेलबाट ६१ अंक जोड्दै अंक तालिकाको तेस्रो स्थानमा यथावत छ । 

शीर्ष स्थानको बार्सिलोनाको ७४ अंक तथा दोस्रो स्थानको एट्लेटिकोको ६५ अंक छ । यता लेगानेस ४१ अंक सहित तालिकाको ११ औ स्थानमा छ ।