टेबल टेनिसमा आठौंको पहिलो स्वर्ण पुलिसलाई

काठमाडौं- आठौं राष्ट्रिय खेलकुदको पहिलो स्वर्ण पदक नेपाल पुलिस क्लबले हात पारेको छ । टेबल टेनिसको महिला टिम इभेन्टमा नेपाल पुलिस क्लबले आठौं राष्ट्रिय खेलकुदको पहिलो स्वर्ण पदक हात पारेको हो ।
 
बिहिबमर भएको खेलमा पुलिसले एपिएफ क्लबलाई ३-१ ले पराजित गर्दै पहिलो स्वर्ण जितेको हो । पुलिसकी एलिना महर्जनले सेलिषा खड्गीलाई ३-२ तथा नविता श्रेष्ठले अनिता महर्जनलाई ३-० ले पराजित गरेपछि पुलिस २-० ले अगाडी बढेको थियो । 

तेस्रो खेलमा पुलिसकी मन्जु सुवाल एपिएफकी सिक्का सुवालसँग ३-१ ले पराजित भएपछि एपीएफले पुनरागमन गर्ने सम्भावना देखिएको थियो । तर राष्ट्रिय च्याम्पियन नविताले सेलिषालाई ३-१ ले पराजित गर्दै समग्रमा पुलिसको जित सुनिश्चित गरिन् । पुलिसले यसअघि पनि महिलातर्फ स्वर्ण हासिल गरेको थियो ।