युभेन्टस आयाक्ससँग बराबरीमा रोकियो

एजेन्सी- युइएफए च्याम्पियन्स लिग फुटबल अन्तर्गत क्वाटरफाइनलको पहिलो लेगमा इटालियन क्लब युभेन्ट्स र डच क्लब आयाक्स बराबरीमा रोकिएका छन् । बुधबार राति भएको खेलमा युभेन्ट्स र आयाक्स १-१ गोलको बराबरीमा रोकिएका हुन् । 

आयाक्सको घरेलु मैदानमा भएको खेलमा सुरुवाती अग्रता भने युभेन्ट्सले लिएको थियो । पहिलो हाफको अन्तिम मिनेटमा युभेन्ट्सले सुरुवाती अग्रता लिएको हो । खेलको ४५ औं मिनेटमा क्रिस्टियानो रोनाल्डोले गोल गर्दै पाहुना टोलीलाई सुरुवाती अग्रता दिलाए । 

उनले जोआओ कान्सेलोको पासमा डाइभिङ हेड गोल गरेका थिए । तर, दोस्रो हाफ सुरुभएको १ मिनेट नबित्दै आयाक्सले बराबरी गोल फर्काएको थियो । खेलको ४६ औं मिनेटमा डेभिड नेरिसले गोल गर्दै आयाक्सलाई खेलमा फर्काएका थिए ।

त्यसपछि दुवै टोलीले थप गोल हुन नसक्दा खेल १-१ को बराबरीमा सकिएको हो । यस बराबरीसँगै दुवै टोलीको सेमिफाइनल पुग्ने सम्भावना जिवितै राखेका छन् । अब दोस्रो लेग दुबै टोलीले युभेन्ट्सको घरेलु मैदानमा १६ अप्रिलमा हुनेछ ।