सिटी प्रिमियर लिगको शीर्ष स्थानमा

एजेन्सी- इंग्लिस प्रिमियर लिग फुटबलमा म्यानचेस्टर सिटी लिभरपुललाई पछि पार्दै शीर्षस्थानमा उक्लिएको छ । बुधबार राती भएको खेलमा कार्डिफ सिटीलाई २-० गोल अन्तरले पराजित गर्दै सिटी शीर्षस्थानमा उक्लिएको हो ।

सिटीको जितका लागि केभिन डि ब्रुयन र लिरोए सानेले एक एक गोल गरे । घरेलु मैदानमा सिटीले खेलको छैटौं मिनेटमा सुरुवाती अग्रता लिएको थियो । खेलको छैटौ मिनेटमा डि ब्रुयनले गोल गर्दै घरेलु टोलीलाई सुरुवाती अग्रता दिलाए । 

त्यसपछि पहिलो हाफ सकिन एक मिनेट बाँकी रहँदा लिरोए सानेले गोल गरेपछि सिटीले सहज जित निकालेको हो । पहिलो हाफमा २-० को अग्रता बनाएको सिटीले दोस्रो हाफमा आक्रमक खेल खेले पनि थप गोल गर्न सकेन । 

जितसँगै सिटीले शीर्ष स्थानमा दोस्रो स्थानको लभरपुल भन्दा एक १ अंकले अग्रता लिएको छ । सिटीको ३२ खेलबाट ८० अंक पुगेको छ । समान खेलबाटै लिभरपुलको ७९ अंक छ । कार्डिफ २८ अंकसहित रेलिगेसन जोनको १८औं स्थानमा छ ।