बलियो अबहानीलाई कडा टक्कर दिनेछौ : कप्तान विराज

काठमाडौं- एएफसी कप फुटबल अन्तर्गत नेपालको लिग च्याम्पियन क्लब मनाङ मस्र्याङ्दी क्लबले बुधबार बंगलादेशी लिग विजेता ढाका अबहानी लिमिटेडसँग आफ्नो पहिलो खेल खेल्दै छ । खेल सातदोबाटो स्थित एन्फा कम्प्लेक्स दिउँसो ३ बजे सुरु हुनेछ । 

समूह चरणको पहिलो खेलमा मनाङ बलियो टोली अबहानीविरुद्ध मैदान उत्रदा सुखद सुरुवात गर्ने लक्ष्यमा हुनेछ । होम एण्ड अवेका आधारमा हुने एएफसी कपमा मनाङले पहिलो खेल घरेलु मैदानमा खेल्दै छ । 

टिम राम्रो बनेकाले घरेलु मैदानमा सुखद नतिजा निकाल्ने लक्ष्यका साथ मैदानमा उत्रिने मनाङका प्रशिक्षक छिरिङ लोप्साङले बताए । ‘डिफेन्स लाइन, मिड र स्ट्राइकर लिगको भन्दा बलियो भएको छ । लिगमा भन्दा धेरै परिवर्तन छ । हाम्रो जित्ने लक्ष्य छ’ प्रशिक्षक छिरिङले भने । मनाङका प्रशिक्षक छिरिङले पहिलो खेल कठिन हुने भएपछि सुखद सुरुवात गर्दै दोस्रो चरणमा पुग्ने लक्ष्य रहेको बताए । 

एएफसी यू-२३ च्याम्पियनसिप छनोट र नेपालको ओमनसँगको मैत्रीपूर्ण खेलले टोलीको अभ्यासमा केहि समस्या भएको प्रशिक्षक छिरिङले बताए । यस्तै कप्तान विराज महर्जनले टिम शारीरिक र मानशिक रुपमा तयार भएकाले घरेलु मैदानमा बलियो अबहानीलाई कडा टक्कर दिने बताए ।