आइपिएलमा सन्दीपको उत्कृष्ट प्रदर्शन

एजेन्सी- नेपाली राष्ट्रिय टोलीका महत्वपूर्ण खेलाडी सन्दीप लामिछानेले जारी सिजनको इन्डियन प्रिमियर लिग (आइपिएल)मा उत्कृष्ट सुरुवात गरेका छन् । कोलकाता नाइट राइडर्सविरुद्ध पहिलो रोजाइमा खेल्दै सन्दीपले उत्कृष्ट सुरुवात गरेका हुन् । 

सन्दीपले कोलकाताविरुद्ध ४ ओभर बलि‌‌ङ गर्दै २९ रन खर्चेर १ विकेट लिए । सन्दीपले आफ्नो ओभरमा मात्र १ रन खर्चे । उनले निखिल नाईकलाई पहिलो पाँच बल डट गराएका थिए भने अन्तिम बलमा १ रन दिएका थिए । व्यक्तिगत दोस्रो ओभर लिएर आएका सन्दीपले ६ रन खर्चे ।  उनले आफ्नो दोस्रो ओभरमा निकै दवावमा रहेका नाईकलाई एलबीडब्लू आउट गरे । 

आफ्नो तेस्रो ओभरमा उनले शुभ्मन गिललाई रनआउट गराए । उनले ३ ओभर सकिसक्दा मात्र १२ रन खर्चेर १ विकेटको अवस्थामा थिए । तर, उनी चौथो ओभरमा उनी निकै पिटिए । 

१२ औं ओभरमा दिनेश कार्तिकलाई सुरुवाती दुई बल डट गराएपनि तेस्रो बलमा कार्तिकले चौका प्रहार गरे । चौथो बलमा एक रन लिएपछि रुसेल स्ट्राइकमा आए । रुसेलले पाँचौ बलमा सन्दीपलाई मिड विकेट बाउन्ड्रीमाथि छक्का प्रहार गरेपछि अन्तिम बलमा पनि छक्का प्रहार गर्न सफल रहे ।