आठौंका खेल चैत २७ बाट सुरु हुने

काठमाडौं- प्रदेश नम्बर ५ मा आयोजना हुने आठौं राष्ट्रिय खेलकुद प्रतियोगिताको खेलहरु चैत २७ गतेबाट सुरु हुने भएका छन् । प्रतियोगिताको उद्घाटन बैशाख ५ गते नेपालगञ्ज रंगशालामा हुने भएपनि खेलहरु भने चैत २७ बाट सुरु हुने राष्ट्रिय खेलकुद परिषद् (राखेप)ले शनिबार पत्रकार सम्मेलनको आयोजना गर्नै जानकारी दिएको हो । प्रतियोगिताको समापन नेपालगञ्ज रंगशालामा नै बैशाख ११ गते हुनेछ ।

प्रतियोगिताका अधिकांस खेलहरु बाँकेमा हुने छन् । त्यस्तै केहिह खेल दाङ, बर्दिया, रुपन्देही र कपिलवस्तुका संचालन हुने छन् । तीन खेल भने प्रदेश नम्बर ५ भन्दा बाहिर हुने छन् । स्क्वास ललितपुरमा हुने छ भने प्यिाराग्लाइडिङ पोखरा र गल्फ काठामाडौंमा संचालन हुने छन् ।  

प्रतियोगितामा कुल ३५ खेलका ५ हजार बढी महिला र पुरुष खेलाडीले प्रतिस्पर्धा गर्ने छन् । प्रतियोगितामा सहभागी खेलाडी मध्ये २ हजार ८२५ पुरुष खेलाडी र २ हजार ३८६ महिला खेलाडी रहेका छन् । यस्तै ६४० प्रशिक्षक र ४६१ टिम व्यव्स्थापक रहनेछन् । 

प्रतियोगिता संचालन गर्न ९२२ राष्ट्रिय तथा अन्तराष्ट्रिय निर्णायक र ४७१ स्थानीय निर्णायक रहने छन् । खेलाडीले ३७२ स्वर्ण, ३७२ रजत र ५६३ काश्यका लागि प्रतिस्पर्धा गर्ने छन् । व्यक्तिगत विधामा स्वर्ण विजेताले १५ हजार र सामुहिकतर्फको विजेताले ७ हजार पाउने छन् । आठौंमा राष्ट्रिय कीर्तिमान भङ्ग गर्नेले २५ हजार पाउने छन् ।

प्रतियोगितामा ७ प्रदेश, तीन विभागीय टिम त्रिभुवन आर्मी क्लब, एपीएफ क्लब, नेपाल पुलिस क्लब र एक एनआरएनए टिमका खेलाडीले प्रतिस्पर्धा गर्ने छन् । आठौंमा फुटबल, क्रिकेट, भलिबल, बक्सिङ, तेक्वान्दो, टेबल टेनिस, उसु, जुडो, ह्याडबल, कराँते, हकी, सुटिङ, जिम्न्याष्टिक, साईकिलिङ, आर्चरी, फेन्सिङ, पौडी र ट्रायथलन खेल समावेश गरिएको छ । 

यस्तै एथ्लेटिक्स, फुल कन्ट्याक्ट कराँते, ब्याटमिन्टन, बास्केटबल, आईटीएफ तेक्वान्दो, शारीरिक सुगठन, सफ्ट टेनिस, लन टेनिस, तेक्वान्दो, कबड्डी, बुद्विचाल, खोखो, सेपाकताक्रो, स्क्वास, प्याराग्याईडिङ, कुस्ती र गल्फ समावेश गरिएको छ ।