फ्रान्सको जितमा एमबाप्पे नायक

एजेन्सी- विश्व विजेता फ्रान्सले युरो कप छनोटमा आइसल्यान्डलाई पराजित गरेको छ । सोमबार राती घरेलु मैदानमा भएको खेलमा फ्रान्सले आइसल्याण्डलाई ४-० गोल अन्तरले पराजित गरेको हो ।  

फ्रान्सको जितका लागि सामुएल उम्टिटी, ओलिभर जिरुउड, केलियन एमबाप्पे र एन्टोइन ग्रिजमनले समान एक एक गोल गरे । खेलको १२औं मिनेटमा उम्टिटीले गोल गर्दै घरेलु टोलीलाई अग्रता दिलाए । 

पहिलो हाफमा १-० को अग्रता बनाएको फ्रान्सले दोस्रो हाफमा थप तीन गोल गर्यो । ६८औं मिनेटमा ओलिभर जिरुउडले गोल गर्दै फ्रान्सको अग्रता दोब्बर पारे । ७८औं मिनेटमा युवा स्टार फरवार्ड केलियन एमबाप्पेले गोल गरेपछि फ्रान्सले ३-० को बनायो । 

८४ औं मिनेटमा एन्टोइन ग्रिजमनले गोल गरेपछि फ्रान्सले ४-० को सहज जित निकालेको हो । यस खेलमा युवा स्टार खेलाडी एमबाप्पे नायक बने उनले आफ्नो टोलीको जितका लागि एक गोल र दुई असिस्ट समेत गरेको थिए ।

जितसँगै फ्रान्स समूह ‘एच’ मा अपराजित रहँदै दुई खेलबाट ६ अंक जोडेर तालिकाको शीर्षस्थानमा रहेको छ । पराजित आइसल्यान्ड ३ अंकसहित चौथो स्थानमा छ ।