‘साफ’मा असफल भुटान

विराटनगर- बंगलादेशबाट सुरु भएको साफ महिला च्याम्पियनसिपमा नियमित प्रतिद्वन्द्वी राष्ट्र हो भुटान । सन् २०१० मा बंगलादेशमा सम्पन्न पहिलो साफ महिला च्याम्पियनसिप देखी नेपालको विराटनगरमा जारी पाँचौ संस्करणको साफ महिला च्यम्पियनसिप सम्म भुटानी महिला राष्ट्रिय फुटबल टोलीले सहभागिता जनाउदै आएको छ । तर, भुटानले कुनै पनि संस्करणमा समूह चरण पार गर्न सकेको छैन् । यती सम्मकी साफको पाँचौ संस्करण सम्म १४ खेल खेल्दा समेत कुनै एक खेल समेत जित्न सकेको छैन् । 

भुटानले १४ खेलमा १ खेल बराबरी खेलेको छ भने बाँकी १३ खेलमा नराम्रो पराजय भोगेको छ । यसै कारण पनि सायदै दावाका साथ भन्न सकिन्छ की भुटान दक्षिण एसियाली राष्ट्र मध्यमा सबैभन्दा कमजोर राष्ट्र हो । 

पहिलो संस्करणको साफमा तीन खेल खेलेको भुटानले दुईमा नराम्रो हार व्यहोरेको थियो भने एक खेलमा श्रीलंकासँग १-१ को बराबरी खेलेको थियो । उक्त संस्करणमा भुटानले प्रतियोगिताभरी एक गोल गर्दा २८ गाले खान पुगेको थियो । आफ्नो पहिलो खेलमा भारतसँग १८-० ले पराजित भएको भुटान दोस्रो खेलमा बंगलादेशसँग ९-० ले पराजित भए । 

सन् २०१२ मा सम्पन्न दोस्रो संस्करणमा तीन खेल खेल्दा तीन वटै खेल गुमाएको भुटानले पहिलो खेलमा नै श्रीलंकसँग ४-० ले पराजति भएको थियो । दोस्रो खेलमा बंगलादेशसँग १-० ले पराजति भएको भुटान तेस्रो खेलमा भारतसँग ११-० को फराकिलो अन्तरले पराजित हुँदै समूह चरणबाटै बाहिरिएको थियो । 

सन् २०१४ मा पाकिस्तानमा भएको तेस्रो संस्करणमा समूहका तीन खेल खेलेको भुटानले तीन वटै खेल गुमाउन पुग्यो । पहिलो खेलमा नेपालसँग ८-० को फराकिलो अन्तरले पराजित भएको भुटान दोस्रो खेलमा श्रीलंकासँग ३-० र आयोजक पाकिस्तानसँग ४-१ गोल अन्तरले पराजित भएको थियो । 

सन् २०१६ मा भारतमा आयोजना भएको चौथो संस्करणमा पनि तीनवटै खेल गुमाएको भुटान आफ्नो पहिलो खेलमा नेपालसँग ८-० ले पराजित भयो । दोस्रो खेलमा श्रीलंकासँग २-० ले पराजित हुदा तेस्रो खेलमा माल्दिभ्ससँग ३-१ ले पराजित भएको थियो ।

पाँचौ संस्करणमा पनि भुटान दुई खेल खेल्दै दुबै खेलमा पराजय भोग्दै समूह चरणबाट बाहिरियो । पहिलो खेलमा आयोजक नेपालसँग ३-० ले पराजित भएको भुटान दोस्रो खेलमा बंगलादेशसँग २-० ले पराजित हुदै घर फर्कियो । पाँचौ संस्करणसम्म आईपुग्दा सम्म भुटानी राष्ट्रिय महिला फुटबल टिम साफको सबै भन्दा कमजोर टिम हो । 

साफमा एक खेलमा पनि जित निकाल्न नसकेको भुटानले त्यसका लागि अझै लामो समय पर्खनु पर्ने देखिन्छ । पछिल्लो समय घरेलु फुटबलमा भुटानले ठुलो परिवर्तन गरेको छ । दक्षिण एसियाको भुटानी पुरुष टिमले गरेको प्रर्दशन र प्राप्त नतिजाले त्यसलाई प्रमाणित गर्दछ । तर त्यसको प्रभाव भने महिला टिममा देखिएको छैन । यसले कति समय लिन्छ, त्यो भने यसै भन्न सकिने आधार छैन ।