साफ च्याम्पियनसिप : नेपालको सुखद सुरुवात

विराटनगर- मंगलबारबाट सुरु भएको पाँचौ साफ महिला च्याम्पियनसिपमा नेपालले सुखद सुरुवात गरेको छ । विराटनगरस्थित शहिद रंगशालमा सम्पन्न खेलमा भुटानलाई ३-० गोल अन्तरले पराजित गर्दै प्रतियोगितामा नेपालले सुखद सुरुवात गरेको हो । 

नेपालको जितका लागि मन्जली कुमारी योन्जन, साबित्रा भण्डारी र कप्तान निरु खड्काले समान एक एक गोल गरे । पहिलो हाफमा २-० को अग्रता बनाएको नेपालले दोस्रो हाफमा थप एक गोल गर्न सफल भयो । 

खेलको १३ औं मिनेटमा मन्जलीले गोल गर्दै नेपाललाई सुरुवाती अग्रता दिलाइन् । सुरुवाती समय देखीनै भुटानमाथि दबाब सृजना गरेको नेपालका लागि मन्जलीले रिबाउन्डबाट आएको बलालाई दिपा राईले पास उपलब्ध गराएको बलको उत्कृष्ट गोल गरेकी हुन् । 

त्यसको तीन मिनेट नबित्दै स्ट्राइकर साबित्रा भण्डारीले गोल गर्दै नेपालको अग्रता दोब्बर पारीन् । उनले मन्जली कुमारीको पासमा भुटानका डिफेन्डर र गोलरक्षकलाई बिट गर्दै सहजै गोल गरेकी हुन् । ५४ औं मिनेटमा राइट कर्नरबाट मन्जलीले गरेको लङ्ग पासमा साबित्राको हेडरलाई कप्तान निरुले वान टच गोल गरेकी हुन् । 

त्यसअघि २९ औं मिनेटमा साबित्राले प्रहार गरेको बलले दिशा लिन सकेन् । ४३ औं मिनेटमा करिब ३३ याडबाट मन्जलीले गरेको प्रहार भुटानकी गोलरक्षक सान्गिता मोन्गेरले बचाउ गरिन् । 

५० औं मिनेटमा भुटानका खेलाडीले अनिता बस्नेतलाई फाउल गरे पछि करिब २५ याडमा पाएको साबित्राको फ्री-किक प्रहारलाई भुटानकि गोलरक्षक सङ्गिताले बचाउ गरिन । ५३ औं मिनेटमा अनिताको वन भर्सेस वनको स्थितिमा गरेको प्रहारले दिशा लिन सकेन ।

 त्यस्तै ६७ औं मिनेटमा साबित्राको प्रहारलाई भुटानकी गोलरक्षकले बचाउ गरिन् । अब नेपालले आफ्नो खेल १६ मार्चमा बंगदेशसँग खेल्ने छ ।