गाजामा इजरायली सेनाको कारबाहीमा हमासका पाँच सदस्य मारिएको दाबी

नेपाल समय | मंगलबार, भदौ ३०, २०८३

नेपाल समय

मंगलबार, भदौ ३०, २०८३

गाजामा इजरायली सेनाको कारबाहीमा हमासका पाँच सदस्य मारिएको दाबी

काठमाडौं- इजरायली सेनाले गाजामा गरिएको सैन्य कारबाहीका क्रममा हमासका पाँच सदस्य मारिएको दाबी गरेको छ। मारिनेमा एक जना सैन्य कमान्डरसमेत रहेको इजरायली सेनाले जनाएको छ।

‘द टाइम्स अफ इजरायल’का अनुसार इजरायली सेना र आन्तरिक सुरक्षा निकाय शिन बेटले पछिल्ला केही सातायता गाजामा आफ्नो कारबाही तीव्र बनाएका छन्।

इजरायली सेनाको निशानामा हमासका सैन्य कमान्डर अहमद अल–बत्श पनि रहेका थिए। उनलाई ‘अबु ओसामा’ नामले समेत चिनिन्थ्यो। हमाससँग सम्बन्धित समाचार स्रोतहरूले पनि उनको मृत्यु भएको पुष्टि गरेका छन्।

इरानको फार्स समाचार संस्थाले गाजासँग सम्बन्धित स्थानीय समाचार स्रोतलाई उद्धृत गर्दै अहमद अल–बत्श हमासको सशस्त्र इकाइ इज्ज अल–दीन अल–कस्साम ब्रिगेडका कमान्डर रहेको जनाएको छ। उनको इजरायली हवाई आक्रमणमा मृत्यु भएको बताइएको छ।

अलजजिराका अनुसार गाजा सहरको उत्तरमा पर्ने अल–सफ्तावी सडकमा एउटा कारलाई लक्षित गरी गरिएको हवाई आक्रमणमा अल–बत्श मारिएका थिए। उक्त क्षेत्र जबालियाको पश्चिममा पर्छ।

इजरायली सेनाले गाजामा हमासविरुद्धको सैन्य कारबाही निरन्तर जारी रहेको र पछिल्ला साताहरूमा त्यस्ता कारबाही थप तीव्र पारिएको जनाएको छ।

प्रकाशित: Sep 15, 2026| 10:57 मंगलबार, भदौ ३०, २०८३