हलिउड चलचित्र प्रतिबन्धका बाबजुद रुसमा 'स्पाइडर-म्यान : ब्रान्ड न्यु डे' कसरी प्रदर्शन हुँदैछ ?

काठमाडौं- रुसमा हलिउड चलचित्रको प्रदर्शनमा प्रतिबन्ध र युक्रेनसँग जारी युद्धका कारण सोनी पिक्चर्सले रुसमा आफ्ना चलचित्रको प्रदर्शन बन्द गरे पनि ‘स्पाइडर–म्यान : ब्रान्ड न्यु डे’ भने देशभरका चलचित्रघरमा प्रदर्शन भइरहेको छ।

चलचित्र हेर्न सयौँ दर्शक स्पाइडर म्यानको चर्चित पोसाक लगाएर चलचित्रघर पुगेका छन्। हलिउडका ठूला चलचित्रमाथि विभिन्न किसिमका रोक रहे पनि यो चलचित्र कसरी रुसका पर्दासम्म पुग्यो भन्ने विषय अहिले चर्चामा छ।

चलचित्रको आधिकारिक वितरकमार्फत अनुमति बिना प्रदर्शन गर्नु रुसी तथा अन्तर्राष्ट्रिय कानुनविपरीत मानिन्छ। तर, यस्ता गैरकानुनी गतिविधिप्रति रुसी अधिकारीहरूले प्रायः आँखा चिम्लिने गरेका छन्।

रुसमा हलिउड चलचित्र पुग्ने मुख्य माध्यम पछिल्ला वर्षमा विकसित भएको अनौपचारिक वितरण प्रणाली हो। युक्रेनमाथि रुसले आक्रमण गरेपछि हलिउडका प्रमुख चलचित्र निर्माण कम्पनीहरूले रुसबाट आफ्ना चलचित्र फिर्ता लगेका थिए। त्यसपछि चलचित्रघरहरूले आधिकारिक वितरण प्रणालीबाहिरबाट चलचित्र प्राप्त गरेर प्रदर्शन गर्ने अभ्यास बढेको हो।

यस्ता स्वतन्त्र वितरकहरूले चलचित्र निर्माण कम्पनीको नियमित वितरण प्रणालीबाहिरबाट चलचित्रको प्रति प्राप्त गर्ने र त्यसलाई व्यक्तिगत चलचित्रघरमार्फत प्रदर्शनको व्यवस्था मिलाउने गरेका छन्। यसरी प्रदर्शन गरिएका चलचित्रलाई सम्बन्धित हलिउड कम्पनीले आधिकारिक रूपमा अनुमति दिएको हुँदैन। त्यसैले सोनी पिक्चर्सले ‘स्पाइडर–म्यान : ब्रान्ड न्यु डे’ रुसमा आधिकारिक रूपमा वितरण गरेको छैन। 

यही अनौपचारिक वितरण प्रणालीका कारण हलिउडका चलचित्र निर्माण कम्पनीहरूले रुसी बजार छाडे पनि रुसी दर्शकले ठूला हलिउड चलचित्र हेर्न पाएका छन्।

रुसले सबै विदेशी चलचित्रलाई चलचित्रघरमा प्रदर्शन गर्न पूर्ण रूपमा प्रतिबन्ध लगाएको छैन। बरु त्यहाँको जटिल प्रतिलिपि अधिकार र चलचित्र वितरणसम्बन्धी व्यवस्थाले आधिकारिक हलिउड वितरण नभएको अवस्थामा चलचित्रघर र वितरकलाई वैकल्पिक बाटो खोज्ने ठाउँ दिएको छ।

यसअघि पनि यस्तै व्यवस्थाको प्रयोग गर्दै हलिउडका अन्य ठूला चलचित्र रुसी चलचित्रघरमा प्रदर्शन भइसकेका छन्। ती चलचित्र सम्बन्धित निर्माण कम्पनीको प्रत्यक्ष संलग्नताबिना रुसी दर्शकमाझ पुर्‍याइएका थिए।

अहिलेसम्म ‘स्पाइडर–म्यान : ब्रान्ड न्यु डे’ ले विश्वभर २ अर्ब ३३ करोड २८ लाख डलर कमाई गरेको छ। अहिलेसम्मको आँकडा अनुसार यस फिल्मले हलिवुड फिल्मको इतिहासमा सबै भन्दा धेरै कमाउने सूचीमा चौथो स्थानमा रहेको छ। यस सूचीमा अवतार शिर्ष स्थानमा छ भने एभेन्जर: इन्डगेम दोस्रो र अवतार: द वार अफ वाटर तेस्रो स्थानमा रहेका छन्।