बेलायत र युरोपमा व्यबसाय फैलाउँदै नेपाली ब्यवसायी छोङनुर्बु

काठमाडौं । मानिसलाई सफलता भेट्न संघर्षको भीमकाय पहाड उक्लिनुपर्छ। त्यो मान्छे मात्र जीवनमा सफलता हासिल गर्न सक्छ, जसले अथक र योजनावद्ध रुपमा आफ्नो सपनाको उडान भर्ने गर्छ।

त्यस्तै एक सफल व्यक्ति हुन्, दोलखामा जन्मिएका छोङनुर्बु शेर्पा। सानोमा उनीमा पनि कुनै सपना थिएन। अध्ययन गर्ने र जीवनमा जे पर्छ त्यही टर्ला सोचेका थिए। तर, उनी जीवनका थुप्रै सपनाको उडान भरेर १६ वर्षअघि बेलायत पुगेँ।

उनले त्यहाँ अध्ययन मात्र गरेनन्। जीवनमा केही गर्नुपर्छ भन्ने बोध भयो। र, २०१४ मा इरोसुसी नामक व्यवसाय सञ्चालन गरे। उनी यो बीचमा त्यत्तिमै रमाएनन्। आफ्नो व्यवसायको साम्राज्य विस्तार गर्दै गए।

त्यसक्रममा थुप्रै चुनौति आए। उनी त्यसबाट आत्तिएनन्। सहजतामा नमात्तिएका उनी असहजतामा पनि आत्तिएनन्। र, आफ्नो व्यवसाय अगाडि बढाइरहे।

आजको मितिमा आइपुग्दा उनले विभिन्न शहरमा इरोसुसीका ३० शाखा विस्तार गरिसकेका छन्। उनको व्यवसाय बेलायतमा मात्र नभएर युरोपका अन्य देशमा पनि फैलदो क्रममा छ।

छोङनुर्बुको बाल्यकाल निकै संघर्षपुर्ण रह्यो। उनीहरूको चौरीखर्क थियो। उनका बुबाआमा चौरीखर्कमै रात काट्थे। उनी भाइसँग गाउँमा बस्थे र बिदाको मात्र बाआमालाई भेट्न जान्थे।

गाउँमा बाआमासँग अलग बस्नुको उदेश्य अध्ययन गर्नु हुन्थ्यो। उनी २०६१ सालमा एसएलसी पास भएर काठमाडौं आए। काठमाडौंमा उनको जीवनको नयाँ संघर्ष सुरु भयो। विभिन्न दु:ख गरेर उनले १२ सम्मको अध्ययन सके। त्यसपछि दुई वर्ष व्रिटिस आर्मीको तयारी गरे। तर, त्यहाँ उनलाई हातमा सफलता लाग्न सकेन।

त्यसपछि नयाँ सोच जन्मियो। अब के गर्ने? त्यसपछि अस्ट्रेलियाको भीसा प्रयास गरे,त्यहाँ पनि सफलता लाग्न सकेनन्। अनी प्रयास गरे युके, युकेको भीसामा उनलाई सफलता मिल्यो । र, उनी युके हानिए। त्यहाँ पनि उनले विभिन्न ठाउँमा काम गरे।

कामकै क्रममा आफ्नै केही गर्नुपर्छ भन्ने सोच पलायो। त्यसपछि उनले इरोसुसी नाममा व्यवसाय सुरु गरे। आज उनको व्यवसायले नयाँ साम्राज्य निर्माण गरिरहेको छ। आगामी दिनमा यसलाई थप विस्तार गर्दै लगिने उनले बताएका छन्।