आन्दोलनबाट फर्किएका प्रधानाध्यापकको दुर्घटनामा मृत्यु

राष्ट्रिय शिक्षक महासंघले काठमाडौंमा गरिरहेको आन्दोलनमा सहभागी भएर घर फर्किरहेका एक प्रधानाध्यापकको सवारी दुर्घटनामा निधन भएको छ। 

मनाङको नार्फु गाउँपालिका–८ का मन घलेको मृत्यु भएको हो। उनी मनाङको नासो गाउँपालिका–८ मा रहेको जनविकास आधारभूत विद्यालयका प्रधानाध्यापक थिए।

शिक्षकहरूको आन्दोलनमा सहभागिता जनाउन काठमाडौं आएका घले फर्किने क्रममा तनहुँमा दुर्घटनामा परेका हुन्।

आइतबार तनहुँको भानु नगरपालिका–१०, नेपालटारमा भएको स्कुटर र जीप दुर्घटनामा घलेले ज्यान गुमाएका हुन्। नेपाल शिक्षक महासंघले आफ्ना सदस्य समेत रहेका घलेको निधनप्रति समवेदना व्यक्त गरेको छ।

डुम्रे–बेँसीसहर सडक खण्डमा डुम्रेबाट लमजुङतर्फ जाँदै गरेको बा २ ख ४०२२ नम्बरको माइक्रोबस र ग २६ प ४०५८ नम्बरको स्कुटर आपसमा ठोक्किँदा दुर्घटना भएको जिल्ला प्रहरी कार्यालय तनहुँले जनाएको छ।

सोही दुर्घटनामा स्कुटर पछाडि सवार लमजुङको बेँसीसहर नगरपालिका–८ की ३२ वर्षीया अनिता थापा श्रेष्ठको प्रदेश अस्पताल दमौलीमा उपचारको क्रममा निधन भएको छ।