कर्णालीमा २१ महिनामा ६५ पुल निर्माण

सुर्खेत- आर्थिक वर्ष २०८/८१ देखि हालसम्मका २१ महिनाको अवधिमा कर्णाली प्रदेशभरी ६५ पुल निर्माण भएका छन्। भौतिक पूर्वाधार तथा सहरी विकास मन्त्रालयले दिएको विवरणअनुसार २३ पक्की पुल तथा ४२ झोलुंगे पुल निर्माण भएका हुन्।

चालु आर्थिक वर्षको साउनदेखि पुससम्म छवटा झोलुंगे पुल निर्माण भएका छन्। पाँच वटा सडकमा पुल (मोटरेबल) निर्माण भएको पूर्वाधार तथा सहरी विकास मन्त्रालयका प्रवक्ता रमेश सुवेदीले जानकारी दिए। हुम्लामा चार र कालीकोटमा दुई झोलुंगे पुल निर्माण भएका छन्। त्यस्तै सुर्खेतमा एक, जाजरकोटमा एक, कालीकोटमा एक, मुगुमा एक र सल्यानमा एक मोटरेबल पुल निर्माण भएका हुन्। चालु आवमै २१ दशमलव ४५ किलोमिटर सडक कालोपत्र गरिएको छ।

यो अवधिमा ९५ किलोमिटर कालोपत्र गरिएको भौतिक पूर्वाधार तथा सहरी विकास मन्त्रालयका प्रवक्ता सुवेदीले जानकारी दिए। दुई सय पाँच किलोमिटर ग्राभेल र ५२५ कच्ची सडक कटानको काम भएको उनले जानकारी दिए। आर्थिक वर्ष २०८१/८२ का लागि बहुवर्षे ठेक्का हुने गरेर आठ वटा नयाँ मोटरेबल पुल निर्माणका लागि स्वीकृति दिइएको छ। त्यस्तै एक बेलिब्रिज पुल निर्माण गर्नका लागि सहमति प्रदान गरिएको छ।

४१ वटा नयाँ झोलुंगे पुल निर्माण गर्नका लागि स्रोत सुनिश्चित गरेर बहुवर्षे ठेक्काको काम सुरु भएको छ। रुकुम-पश्चिममा पाँच योजनामध्ये एक सडक, दुई पुल र दुई झोलुंगे पुल मात्र स्रोत सुनिश्चित गरिएको छ। जाजरकोटका तीन बेलिब्रिज पुलका लागि स्रोत सुनिश्चित भई काम सुरु गरे पनि बारेकोट र नलगाड नगरपालिकाको बीचमा रहेको खारामा नलगाड जलविद्युत् आयोजनाले पनि पुल निर्माण गरिरहेकाले सो ठाउँमा अहिले तत्काल पुलको काम रोखिएको छ।

एघार योजना सुर्खेतमा स्रोत सुनिश्चित गरिएको छ। त्यसमध्ये चार झोलुंगे पुल, चार सडक, दुई सडक तथा पुल र अन्य संरचना एउटा रहेको छ। दैलेखमा दुई मोटरेबल पुल, आठ झोलुंगे पुलको लागि बजेट सुनिश्चित गरिएको छ। मुगुमा ६ वटा योजनाको मात्र स्रोत सुरक्षित गरिएको छ।

हुम्लामा तीन, डोल्पामा आठ, जाजरकोटमा चार, कालीकोटमा तीन, दैलेखमा आठ, सल्यानमा सात र जुम्लामा चार योजनाको बजेट सुनिश्चित गरिएको छ। कर्णाली ६१ योजनाको स्रोत सुरक्षित गरिएको मन्त्रालयका प्रवक्ता सुवेदीले जानकारी दिए।

चालु आर्थिक वर्षमा ग्रामीण सडक सञ्जाल सुधार आयोजनाअन्तर्गत सुर्खेतको दशरथपुर-जितेजुवा-ढाँडखेत-मटेला-धरमपोखरा सडक, जाजरकोटको पश्चिम क्षेत्रमा रहेको शिवालय गाउँपालिकाको मोर्क हुँदै छेडागाड नगरपालिकाको चङ्खिला-बडावन-जुनिचाँदेको सानाखोलाको काम सुरु भएको छ। रुकुम-पश्चिमको चौरजहारी नगरपालिकाको नार्जी-खोलागाउँ-चौखा-बैरागीठाँटी, मुसीकोट-सल्ले सडकको कालोपत्रको काम सुरु गरिएको उनले जानकारी दिए।

प्रादेशिक तथा स्थानीय सडक सुधार आयोजनाअन्तर्गत दैलेखको डुंगेश्वर-डाँडापराजुल सडक स्तरोन्नति तथा दैलेखको सम्झौताको काम पुरा भएर काम सुरु हुन लागेको छ। गल्फागाड-थालाकाटे सडक स्नरोन्नतिको कामसमेत सुरु भएको छ।

राष्ट्रिय खेलकुद प्रतियोगितालाई लक्षित गरी वीरेन्द्रनगरस्थित रंगशाला वरिपरि, सुर्खेत विमानस्थल जोड्नेलगायतका सडक कालोपत्र गर्ने काम पुरा भएको उनले जानकारी दिए हुम्लाको खार्पु-सिमकोट नमुना एकीकृत पूर्वाधार विकास कार्यक्रम तथा डोल्पाको शे-फोक्सुण्डो गाउँपालिकाको रिङ्बो बस्ती विकास कार्यक्रमको सम्झौता हुने चरणमा रहेको जानकारी गराइएको छ।

प्रादेशिक सडक गुरुयोजना अद्यावधिक गरी स्वीकृतिको अन्तिम चरणमा रहेको जनाइएको छ। सुस्त गतिमा काम गरिरहेका करिब ३५ सडक तथा पुल आयोजनाको हाल दुई तिहाइ आयोजनामा प्रगति सन्तोषजनक रूपमा अघि बढेको मन्त्रालयको दाबी छ। 

यस्तै भूकम्प प्रभावित जाजरकोट, रुकुमपश्चिम र सल्यानका क्षति भएका सार्वजनिक विद्यालय तथा स्वास्थ्य संस्थाहरूको पुनर्निर्माणका लागि कुल ५० करोड रूपैयाँ विनियोजन भइ ६२ विद्यालय र १८ स्वास्थ्यचौकी गरी कुल ८० संस्थाहरूको पुनर्निर्माणको काम सुरु गरिएको मन्त्रालयले जनाएको छ। रासस