सौराहामा आन्तरिक पर्यटकको चहलपहल बढ्यो

चितवन- नेपाली नयाँ वर्ष मनाउन जिल्लाका पर्यटकीय क्षेत्रमा पर्यटक आउन थालेका छन्। स्वदेशीसँगै विदेशी पर्यटक आउन थालेका हुन्। लामो समययता पर्यटकको सङ्ख्या न्यून रहँदै आएको सौराहा क्षेत्रमा पछिल्ला दिनमा पर्यटकको सङ्ख्या बढ्दै गएको छ।

आज साँझसम्ममा सबै होटल भरिने अपेक्षा व्यवसायीहरूको छ। क्षेत्रीय होटल संघ सौराहाका अध्यक्ष ओमप्रकाश पाण्डेका अनुसार सौराहामा नयाँ वर्ष मनाउन आउने पर्यटकको सङ्ख्या बढ्दै गएको छ। यद्यपि वीरगञ्जको कर्फ्युलगायत आन्दोलनका कारण केही प्रभाव पर्यटन क्षेत्रमा देखिएको छ। यसका साथै सडकका कारण पनि प्रभाव देखिने उनले बताए। उनले भने, 'विभिन्न कारणले प्रभाव पारे पनि नयाँ वर्षको साँझमा सौराहाका होटल भरिन्छन्।'

विगतका वर्षहरूमा नयाँ वर्षको अघिल्लो साँझ पर्यटकले कोठा नपाएर फर्किनुपर्ने अवस्था हुन्थ्यो। त्यस्तो अवस्था भने यस वर्ष नआउने उनको भनाइ छ। माघयता सौराहामा पर्यटकको आगमन कम हुँदै आएको थियो।

संघका उपाध्यक्ष गुणराज थपलियाले केही होटल शुक्रबारदेखि नै भरिएको जनाउँदै अहिलेको बुकिङ राम्रो रहेको बताए। उनले भने, 'मेरो होटल केही दिनयता भरिएको छ, साथीहरूले पनि बुकिङ राम्रो हुँदै गएको बताएका छन्।' यद्यपि विगतको तुलनामा पर्यटकको आगमन कम रहेको उनको भनाइ छ।

शुक्रबार र शनिबार परेकाले पनि पर्यटकको आगमन क्रमशः बढ्दै गएको उनी बताउँछन्। संघका पूर्वअध्यक्ष सुमन घिमिरे विद्यालयमा बिदा र शुक्रबार-शनिबार परेकाले पर्यटकको आगमन बढ्दो रहेको बताउँछन्। उनले भने, 'साँझसम्म सौराहाका सबै होटल भरिन्छन्।'

सौराहामा रेष्टुरेन्ट एन्ड बार एसोसिएसनले आज साँझ सांकृतिक कार्यक्रम आयोजना गरेको जनाउँदै उनले नयाँ वर्षमा रमाउन आउने धेरै नेपाली रहेको बताए। होटल सिद्धार्थ भिलासा वनवासका महाप्रबन्धक प्रकाश न्यौपानेले शुक्रबारदेखि मंगलबारसम्म होटलका ३४ कोठा पूरै भरिएको बताए।

आएका पर्यटकमध्ये आधाभन्दा बढी विदेशी रहेको उनको भनाइ छ। पोल्याण्ड, चीन, भारतलगायत देशबाट पर्यटक धेरै आएका छन्। उनले भने, 'नयाँ वर्षमा होटलमा कोठा छैन भन्दैमा फुर्सद छैन।' अरु बेलामा पर्यटकको आगमन कम भए पनि यो बेला भरिभराउ हुने गरेको उनको भनाइ छ।

जंगल क्राउन होटल पनि केही दिनयता भरिएको छ। होटलका महाप्रबन्धक सन्तोष गिरीका अनुसार दुई महिनायता होटलमा पर्यटकको सङ्ख्या राम्रो छ। शनिबारबाट सबै कोठा भरिएका छन्। अब ‘सिजन’ भएकाले पर्यटकको सङ्ख्या बढ्दै जाने उनले बताए।
 
रेष्टुरेन्ट एन्ड बार एसोसिएसन (रेवान) सौराहाका महासचिव नवीन नेपालले आज साँझ नयाँ वर्ष विशेष कार्यक्रम राखिएको बताए। उनका अनुसार ख्यातिप्राप्त कलाकारको प्रस्तुति हुने भएकाले पर्यटकको सङ्ख्या उल्लेख हुने अपेक्षा गरिएको छ। नेपाली नयाँ वर्ष भएकाले नेपाली पर्यटकलाई लक्षित गरी कार्यक्रम गरिएको नेपालले बताए। उनले भने, 'साँझ अबेरसम्म सौराहामा रमाएर फर्किने पर्यटक पनि हुन्छन्।'

नयाँ वर्ष प्रारम्भसँगै सौराहा आउने पर्यटक चितवन राष्ट्रिय निकुञ्ज र मध्यवर्ती सामुदायिक वनमा हात्ती, जीप, पैदल, डुंगा सयर गर्ने गर्दछन्। जंगल सफारीका लागि सौराहा विश्वप्रसिद्ध पर्यटकीयस्थल हो। रासस