घाम पावरले नेपालकै ठूलो ब्याट्री स्टोरेज प्रोजेक्ट बनाउने

काठमाडौं- घाम पावरले आफ्ना साझेदारहरू प्राक्टिकल एक्सन र स्वानबार्टनसँग मिलेर संयुक्त राष्ट्र औद्योगिक विकास संगठन (यूएनआईडीओ) बाट नेपालमा हालसम्मकै ठूलो ऊर्जा भण्डारण प्रणाली स्थापना गर्ने परियोजना प्राप्त गरेको छ।

यो परियोजनाले ४ मेगावाट घण्टा (४ एमडब्ल्यूएच) क्षमताको ब्याट्री प्रणाली स्थापना गर्नेछ, जसले उद्योग र व्यवसायहरूलाई डिजेल खपत न्यूनीकरण गर्न र स्मार्ट ग्रिडको विकासमार्फत कार्बन उत्सर्जनमुक्त भविष्यतर्फ अघि बढ्न सहयोग गर्ने विश्वास गरिएको छ।

यो परियोजनाको शुभारम्भ यूएनआईडीओका महानिर्देशक गर्ड मुलरले गरेका थिए। उक्त समारोहमा पाँच फरक देशका राजदूतहरूको उपस्थिति थियो। नेपालको तर्फबाट समारोहमा नेपाली राजदूत भरतकुमार रेग्मी, घाम पावरका प्रमुख कार्यकारी अधिकृत अञ्जल निरौला, साथै स्वानबार्टन र प्राक्टिकल एक्सनका टोलीहरू सहभागी थिए।

यो नवप्रवर्तनकारी परियोजनाले सौर्य ऊर्जाबाट सञ्चालित ठूलो क्षमताको ब्याट्री भण्डारण प्रणालीमार्फत प्रदूषणकारी डिजेल जेनेरेटरहरूको प्रयोगलाई विस्थापन गर्नेछ। आगामी २५ वर्षमा यो परियोजनाले २,८०० टन कार्बन उत्सर्जन घटाउने र १,००० किलोलिटर डिजेल विस्थापन गर्ने अपेक्षा गरिएको छ। यसले नेपालमा स्वच्छ र दिगो औद्योगिक भविष्य निर्माणमा महत्त्वपूर्ण योगदान पुर्‍याउनेछ।

एआई-संचालित ऊर्जा अनुकूलन प्रणालीको प्रयोगले ऊर्जा लागत घटाउने, विश्वसनीयता बढाउने र उद्योगहरूमा दिगो ऊर्जा प्रयोगलाई प्रोत्साहन गर्ने छ। यो परियोजना नेपालको ऊर्जा रूपान्तरणका लागि एउटा कोसेढुंगा साबित हुने अपेक्षा गरिएको छ र यसको विस्तारले थप परिवर्तनकारी समाधान प्रदान गर्ने घाम पावरले उल्लेख गरेको छ।

यूएनआईडीओको “एक्सेलेरेट-टु-डेमोनस्ट्रेट (ए२डी) सुविधा” अन्तर्गत विश्वभर छानिएका पाँच परियोजनामध्ये घाम पावरको यो परियोजना पनि एक हो, जसले एआई-संचालित ऊर्जा समाधानको प्रदर्शन गर्नेछ। अत्याधुनिक प्रविधि र वर्षौंदेखिको समर्पणको संयोजनबाट घाम पावरले नेपाललाई स्वच्छ, स्मार्ट र लचिलो ऊर्जा भविष्यतर्फ अघि बढाइरहेको छ।