तीनकुने घटनाबारे प्रहरीले सार्वजनिक गर्‍यो नयाँ तथ्य

काठमाडौं- यही चैत १५ गते शुक्रबार काठमाडौंको तीनकुनेमा भएको राजावादी समूहको हिंसात्मक प्रदर्शनबारे प्रहरीले आज पत्रकार सम्मेलन गरेर विस्तृत जानकारी दिएको छ। घटनाको ६ दिनपछि प्रहरीले आधिकारिक रुपमा घटनाबारेका तथ्यहरु सार्वजनिक गरेको हो।

यसअघि प्रहरीले घटनाबारे कुनै सूचना वा फोटो अथवा भिडियो भए पठाउन आम सर्वसाधारणलाई आग्रह गरेको थियो। घटनाबारे विभिन्न कोणबाट बह‍स हुनुका साथै अनेक भिडियो पनि सार्वजनिक भइरहेका थिए।

केन्द्रीय प्रहरी प्रवक्ता दिनेश आचार्यले आज पत्रकार सम्मेलनमा दिएको जानकारीअनुसार हिंसात्मक प्रदर्शनलाई नियन्त्रणमा लिने क्रममा चलाएको गोली लागेर २० जना घाइते भएका छन्। गोली लागेकामध्ये दुई जना महिला थिए।

प्रदर्शनका क्रममा गोली लागेर ललितपुरका सविन महर्जनको मृत्यु भएको थियो। कोटेश्वरस्थित शंकर मार्गमा रेविका र दिनेश खत्री घाइते भएका थिए।

गोली लागेर घाइतेमध्ये १३ जनाको अझै विभिन्न अस्पतालमा उपचार भइरहेको छ। उपत्यका प्रहरी कार्यालयले उपलब्ध गराएको विवरणअनुसार शुक्रबार भएको प्रदर्शनमा मात्र प्रहरीले ७४६ राउन्ड अश्रुग्यास हानेको थियो भने १९२ ब्ल्याङ्क राउन्ड फायरिङ गरेको थियो।

५८ राउन्ड हवाई फायर, कार्टिज (छर्रा) २३९ र पेस्तोलबाट २ राउन्ड गोली चलेको छ। यो नेपाल प्रहरीको मात्र विवरण हो। सशस्त्र प्रहरीबाट समेत शुक्रबार गोली चलेको थियो। प्रहरीबाट अत्यधिक बल प्रयोग भएको भन्दै कतिपयले आलोचना गरिरहेका छन्।

प्रदर्शनकारी हिंसात्मक रुपमा प्रस्तुत भएपछि गोली चलाउनुपरेको जनाएको छ। उत्तेजित भिड हिंसात्मक रुपमा प्रस्तुत भएपछि नियन्त्रणमा लिन गोली चलाउनुपरेको प्रहरीको तर्क छ।त्यस्तै, प्रहरीले राजावादी आन्दोलनका क्रममा मञ्चमा राष्ट्रिय गान बज्दाबज्दै टियर ग्यास हानेको भनेर गलत आरोप लागेको पनि उनले प्रष्ट पारेका छन्। सामाजिक सञ्जालमा आएको उक्त भिडियो फेक भएको उनको दाबी छ।

प्रदर्शनकारीहरु बिमानस्थलतर्फ अघि बढेपछि शुक्रबार दिउँसो २ बजेर ५४ मिनेटमा प्रहरीले पहिलो गोली प्रहार गरेको आचार्यले बताए। तीनकुनेमा भेला भएका प्रदर्शनकारीहरु निषेधित क्षेत्र तोड्दै संसद भवनतर्फ अघि बढ्न खोजेपछि त्यसलाई नियन्त्रणमा लिन गोली चलाउनु परेको उनको भनाइ छ।

दुर्गा प्रसाईँ नेतृत्वको भीड तीनकुनेबाट जबरजस्ती अघि बढेपछि प्रदर्शनकारी थप उत्तेजित भएको उनले जानकारी दिए। प्रहरीले निषेधित क्षेत्रबाट हटाएपछि तीनकुनेको मञ्चबाट दुर्गा प्रसाईँ र रवीन्द्र मिश्रले संसद भवन, सिंहदरबार र विमानस्थल कब्जा गर्न माइकिङ गर्दै निर्देशन दिएको र प्रदर्शनकारी तोडफोडमा उत्रिएको प्रवक्ता आचार्यले बताए।

तीनकुनेमा तोडफोड र आगलागी भएको घरमा जान नसकेपछि प्रहरीले पानीको फोहरा प्रहार गरेको र दमकल जान खोज्दा ढुङ्गामुडा समेत भएको प्रहरीले जनाएको छ। प्रवक्ता आचार्यले उक्त घटनापछि फरार रहेका दुर्गा प्रसाईको खोजी कार्य जारी रहेको र हिंसात्मक गतिविधिमा संलग्नको पहिचान गरी नियन्त्रणमा लिइएको जानकारी दिए। प्रदर्शनमा प्रहरीले अनावश्यक बल प्रयोग गर्‍यो भन्ने कुरामा कुनै सत्यता नरहेको र भयावह अवस्थालाई नियन्त्रणमा लिन बल प्रयोग गरेको उनले प्रष्टीकरण दिए। प्रसाईं तीनकुने प्रदर्शनमा उग्र बनेर प्रस्तुत भएका थिए। उनले आफैंले गाडी चलाएर प्रहरीको अगाडि पेलेर अघि बढेका थिए।

राजावादीले गरेको प्रदर्शनका क्रममा घर फर्किँदै गरेका विद्यार्थी रेविका खत्री र दिनेश खत्रीमाथि झुक्किएर गोली लागेको प्रहरीले बताएको छ।

प्रवक्ता आचार्यले भने, ‘ भाटभटेनी सुपरस्टोरमा भएको लुटपाट नियन्त्रणमा लिने क्रममा बल प्रयोग गर्दा त्यसको असर रेविका र उनका दाजुमाथि परेको हो। उहाँहरूलाई झुक्किएर गोली लागेको हुनुपर्छ।’

सोही दिन तीनकुनेको एक घरमा लागेको आगोमा परी एभेन्युज टेलिभिजनका पत्रकार सुरेश रजकको मृत्यु भएको छ।