नेपाल-भारत सीमा क्षेत्र खैरानीघाटसम्म बन्यो सडक

बैतडी- बैतडीको शिवनाथ गाउँपालिका-२ को महाकाली नदी किनारसँग जोडिएको नेपाल-भारत सीमा क्षेत्र खैरानीघाटसम्म सडक निर्माण गरिएको छ। 

गाउँपालिकाको केन्द्र सुल्लेखानदेखि महाकाली नदी किनार खैरानीघाटसम्म कच्ची सडक निर्माण गरिएको हो। शिवनाथ गाउँपालिका र सुदूरपश्चिम प्रदेश सरकारको संयुक्त लगानीमा सडक निर्माण गरिएको गाउँपालिका अध्यक्ष कर्णसिंह साउदले जानकारी दिए।

गाउँपालिका र प्रदेश सरकारको ८० लाख रुपैयाँभन्दा बढीको लगानीमा करिब १६ किलोमिटर सडक निर्माण गरिएको उनले बताए। 

अध्यक्ष साउदले भने, 'स्थानीयको माग र आवश्यकताका आधारमा तीन वर्षदेखि निर्माण सुरु गरिएको सडकको ट्रयाक खोल्ने काम सम्पन्न भएको छ। सडक निर्माणले नदीजन्य सामग्री ल्याउन र ग्रामीण क्षेत्रका कृषिउपजलाई बजारमा पुर्‍याउन सहज भएको छ।'

सडक बनेपछि खैरानीघाटदेखि गाउँपालिका केन्द्रसम्म पुग्न सहज भएको छ। गाउँपालिकाको खाल, बस्कोटी, शर्मालीलगायत गाउँ यो सडक सञ्जालमा जोडिएका छन्। रासस