जसले भाषण नै नगरी बालकृष्ण खाणलाई चुनावमा हराएका थिए

काठमाडौं- प्रतिनिधि सभाका सांसद दीपक बोहराको निधन भएको छ।

राष्ट्रिय प्रजातन्त्र पार्टी (राप्रपा) का सांसद बोहराको आज काठमाडौंको ओम अस्पतालमा उपचारका क्रममा निधन भएको हो। सांसद बोहरा दुई वर्षदेखि बिरामी थिए। थप उपचारका लागि दिल्ली र न्युयोर्क पुगेका बोहराले स्पिच थेरापी लिँदै आएका थिए। पछिल्लो समय भने उनी घरमै स्वास्थ्य लाभ गरिरहेका थिए।

उनी राप्रपाका वरिष्ठ नेता एवं पूर्वमन्त्री हुन्। २०७९ को आम निर्वाचनमा उनी रुपन्देही क्षेत्र नम्बर १ बाट निर्वाचित भएका थिए। उनले तत्कालीन गृहमन्त्रीसमेत रहेका कांग्रेस नेता बालकृष्ण खाणलाई हराएका थिए।

बोहरा ७४ वर्षका थिए। 'उहाँको निधनबाट राप्रपाले समन्वयकारी छवि भएको आफ्नो संस्थापक नेता, रुपन्देहीले विकासप्रेमी लोकप्रिय जनप्रतिनिधि र देशले होनहार राष्ट्रवादी व्यक्तित्व गुमाएको छ। उहाँको निधनबाट म स्तब्ध भएको छु,' राप्रपाका प्रवक्ता मोहन श्रेष्ठले भनेका छन्।

२०७७ साल जेठमा कोरोना भाइरसबाट संक्रमित भएपछि बोहराको स्वास्थ्यमा समस्या देखिएको थियो। संक्रमणको केही समयपछि उनलाई पोस्ट-कोभिड लक्षणहरू देखियो। स्वरमा परिवर्तन र समस्या देखिएकाले उनी चुनावी प्रचारप्रसारका क्रममा बोल्न नसक्ने अवस्थामा थिए। सामान्यतया निर्वाचनमा उम्मेदवारहरू मतदाताको घरदैलोमा पुगेर आफ्नो लागि मत माग्ने गर्छन्। तर बोहरा चुनाव प्रचारप्रसारको समयमा ‘भ्वाइस रेस्ट’ मा थिए। 

उनले कुनै पनि कार्यक्रममा भाषण गर्न पाएनन् र बोलेर मतदातासँग भोट माग्न पनि सकेनन्। घरदैलोका क्रममा मतदातासँग साक्षात्कार गरे पनि बोहराले कसैसँग दोहोरो कुराकानी गरेनन्। उनले इशाराले नै मत मागे। उनको चुनावी सभामा निरञ्जन थापा, राप्रपाका जिल्ला अध्यक्ष प्रदीप उदय, स्वाति थापा, केन्द्रीय सदस्य तोयनाथ लम्साल, सागरप्रताप राणालगायतले सम्बोधन गर्थे।

बोहरा रुपन्देही निर्वाचन क्षेत्र नम्बर ३ बाट विजयी भएका थिए। उनले कांग्रेस नेता बालकृष्ण खाँणलाई हराएका हुन्। त्यतिबेला खाण गृहमन्त्री थिए। खाणलाई २ हजार ६८१ मतले पराजित गर्दै बोहोरा विजयी भएका थिए। बोहोराले ३६ हजार ७१७ र खाँणले ३४ हजार ३६ मत पाएका थिए। बोहरालाई एमाले र जसपाको समेत समर्थन थियो। नबोले पनि उनी आफैंले नेताहरूलाई निर्वाचन क्षेत्रमा परिचालन गर्ने, दैनिक योजना बनाउने, हरेक दिन संयन्त्रको छलफल गर्ने र कार्यक्रममा सहभागी हुने गर्थे।

चुनाव प्रचारप्रसारमा एक शब्द नबोली चुनाव जितेका उनी प्रतिनिधि सभामा एक पटक पनि नबोली बिदा भएका छन्। एकपटक प्रधानमन्त्रीसँग प्रश्नोत्तरका लागि प्रश्न पठाएका थिए। बोली हराएकाले त्यो प्रश्न अरु सांसदले पढिदिने सुविधाका लागि उनले सभामुखसँग आग्रह पनि गरेका थिए । तर, सभामुखले त्यो सुविधा दिन नमिल्ने बताए। बोली हराए पनि अन्य स्वास्थ्य सामान्य हुँदा बोहरा संसद् बैठकमा सहभागी भएका थिए। तर, पछिल्ला केही महिनादेखि उनी गम्भीर बिरामी थिए । 

बोहोरा नेपालको राजनीतिमा झन्डै चार दशकदेखि राप्रपामा क्रियाशील रहँदै आएका थिए। २०३६ सालमा रुपन्देहीबाट राष्ट्रिय पञ्चायत सदस्यमा निर्वाचित उनी २०४२ सालको राष्ट्रिय पञ्चायत सदस्यमा समेत विजयी भएका थिए। उनी २०७० सालमा रुपन्देही निर्वाचन क्षेत्र नम्बर २ बाट संविधानसभा सदस्यमा निर्वाचित भएका थिए।

उनी २०३८ सालमा पर्यटन राज्यमन्त्री र पर्यटन सहायकमन्त्री, २०४० मा पर्यटन राज्यमन्त्री, २०४३ मा निर्माण तथा यातायात राज्यमन्त्री, २०४४ मा निर्माण तथा यातायातमन्त्री, २०६७ मा वन तथा भूसंरक्षण मन्त्री, २०७२ मा श्रम तथा रोजगार मन्त्री, २०७३ सालमा आपूर्तिमन्त्री र २०७४ मा स्वास्थ्यमन्त्री बनेका थिए। उनी ९ पटकसम्म मन्त्री बनेका थिए।

२००७ साल चैतमा जन्मिएका उनी राष्ट्रिय प्रजातन्त्र पार्टीका वरिष्ठ नेता थिए। तर स्वास्थ्य समस्याका कारण उनी राप्रपाको राजनीतिमा सक्रिय थिएनन्।