प्रदेश नामाकरणबारे मुख्यमन्त्री राईले थाले छलफल

विराटनगर- प्रदेशको राजधानी तोकिएको करिव २६ महिनापछि प्रदेश १ को नामाकरणबारे छलफल सुरु हुने भएको छ। प्रदेशको हरेक अधिवेशन सुरु हुनुअघि प्रदेशको नामाकरणको विषय उठ्ने गरेको छ। तर, प्रदेशको नामाकरणको विषय प्रदेश सभामा पेश हुन सकेको छैन। 

चालु आव २०७८/७९ को बजेट पारित भएपछि प्रदेशसभाको बैठक अहिले स्थगित छ। बैठक सुरु भएपछि प्रदेशको नामाकरणको विषय प्रवेश गराउने सरकारको तयारी छ।  

प्रदेश नम्बर १ को नामाकरणको लागि मुख्यमन्त्री शेरधन राईले छलफल थालेका छन्। प्रदेश सभामा प्रतिनिधित्व गर्ने दलका नेताहरूसँग मुख्यमन्त्री राईले नामाकरणको विषयमा परामर्श थालेका हुन्। चालू अधिवेशनबाटै प्रदेशको नाम राख्नका लागि मुख्यमन्त्री राईले पहलकदमी थालेका उनका प्रेस सल्लाहकार ध्रुव सुवेदीले बताए। 

मुख्यमन्त्री राईले दलका नेताहरूसँग प्रदेशको नामका लागि सहमती गरेर अगाडि बढ्नु पर्ने भन्दै छलफललाई तीब्रता दिएको प्रेस सल्लाहकार सुवेदीले बताए। प्रदेश सभामा प्रतिनिधित्व गर्ने नेपाली कांग्रेस, माओवादी केन्द्रलगायत दलका नेताहरूसँग मुख्यमन्त्री राईले छलफल गरेका छन्। 

छलफलका क्रममा दलका नेताहरूले आ–आफ्नो पार्टीभित्र समान धारणा बनाएर अगाडि बढाउने बताएको माओवादी केन्द्र संसदीय दलका नेता इन्द्र आङ्वोले बताए। 

प्रदेश १ को नामाकरणका लागि सगरमाथा, कोशी, कोशी किराँत को नाम बढी चर्चामा ल्याइएको छ। सगरमाथाको आफ्नै पहिचान भएकाले कोशी प्रदेश नाम बढी उपयुक्त हुने अग्रज पत्रकार यज्ञ शर्मा बताउँछन्। उनका अनुसार कोशी प्रदेशको पक्षमा माहौल बन्दै गएको आफूले पाएको उनको भनाई छ। 

संसदको बजेट अधिवेशनमा सामाजिक विकास मन्त्रालयको तर्फबाट जवाफ दिने क्रममा सामाजिक विकास मन्त्री उषाकला राईले कोशी किराँत नाम राख्नु पर्ने बताएकी थिइन्। उनले कोशी किराँत जात भन्दा पनि सभ्यतासँग जोडिएको उनको तर्क छ।