समीर भट्टको दोस्रो फिल्म ‘बलिदान’ फूलपातिमा रिलिज हुने

काठमाडौं- समीर भट्ट स्टारर फिल्म ‘बलिदान’ आगामी दशैंको फूलपातिमा रिलिज हुने भएको छ।

निर्माण पक्षले मंगलबार प्रदर्शन मिति टुंगो लगाएको हो।

चार महिना लगाएर फिल्मको छायांकन फागुन पहिलो साता सकिएको थियो। एक्सन र पोलिटिकल ड्रामा जनराको यो फिल्ममा समीरको शीर्ष भूमिका हुनेछ। उनी विराज भट्टका छोरा हुन्।

फिल्ममा समीरसहित ऋचा शर्मा, सौगात मल्ल, अर्पण थापा, दिव्यदेव, कामेश्वर चौरसिया लगायतको अभिनय छ। फिल्म निर्देशन भने सन्तोष सेनले गरेका हुन्।

समीरको पहिलो फिल्म १२ गाउँ गत वर्षको फूलपातिमा रिलिज भएको थियो र ब्लकबस्टर भएको थियो।