विमानस्थलको एक्स-रे मेसिन बिग्रिदा सुरक्षा चेकजाँचमा समस्या

विराटनगर- विराटनगर विमानस्थलमा रहेको एक्स-रे मेसिन बिग्रिदा सुरक्षा जाँचमा समस्या भएको छ। विमानस्थलको होल्ड ब्यागेज एक्स-रे मेसिन बिग्रिएर थन्किएको डेढ महिना भएको छ। 

एक्स-रे मेसिन विग्रिएपछि प्रहरीले यात्रुका झोला, लगेज र पोकाभित्र राखिएका सामान हातैले चेकजाँच गर्नु परेको छ। यात्रुले पनि लाइनमा बसेर पालो पर्खिदै सामान चेकजाँच गराउनुपर्ने बाध्यता छ। 

विराटनगर विमानस्थलबाट सौर्य, बुद्ध, यति र श्री एयरलाइन्सका जहाजले एक दिनमा १८ वटासम्म उडान भर्ने गरेका छन्। दैनिक एक हजार जनासम्मले यात्रा गरिरहेका हुन्छन्। 

बिग्रिएको पुरानो मेसिन मर्मतसम्भार गर्नसक्ने अवस्था नभएपछि विमानस्थलले काठमाडौंबाट नयाँ मेसिन ल्याएको छ। विमानस्थल प्रमुख उत्सवराज खरेलले काठमाडौंबाट ल्याइएको मेसिन केही दिनभित्रमै सञ्चालनमा आउने बताए। 

विमानस्थलको आन्तरिक सुरक्षा र चेकजाँचका लागि प्रहरी नायब निरीक्षक (सई) चन्द्रशेखर शिवाकोटीको नेतृत्वमा नेपाल प्रहरीको टोली परिचालित छ। यात्रुसँग प्रत्यक्ष सम्पर्कमा रहेर कोरोनाको जोखिमका बेला प्रहरीले सबै सामान हातैले चेकजाँच गर्नुपर्ने अवस्था रहेको शिवाकोटीले बताए। उनले भने, ‘हातले नै सामान चेक गरे पनि सुरक्षा चेकजाँच प्रभावकारी हुन सकिरहेको छैन।’