हसिनाको जित : बंगलादेशको भविष्य

काठमाडौं- बंगलादेशी प्रधानमन्त्री सेख हसिना चौथो कार्यकालका लागि विजयी भएकी छन् । सत्तारुढ दल अवामी लिगले संसद्को तीन सय सिटमा दुई सय ८८ सिटमा जित तय गरेको छ । हसिनाको जितलाई स्वदेशी एवं विदेशी सञ्चारमाध्यमले सत्तारूढ दलको ‘ल्यान्ड स्लाइड भिक्ट्री’ बताइरहेका छन् ।

विजयी घोषित भएपछि हसिनाले राजनीतिक दलका नेताहरु, सुरक्षा एजेन्सीका प्रमुख, प्रशासन प्रमुखहरु एवं नागरिक अगुवासँग भेटघाट गरेकी छन् । हसिना बंगलादेश स्वतन्त्र भएपछि सबैभन्दा लामो समय शासन गर्ने प्रधानमन्त्री बन्न पुगेकी छन् ।     
 
उनी बंगबन्धु शेख मुजिबर रहमानकी छोरी हुन् । स्वतन्त्रता संग्रामका नायक रहमान एक अब्बल रजनीतिक नेता थिए । उनी सदैब तटस्थता, शान्तिकामी एवं लोकतन्त्रमा विश्वास राख्ने नेता मानिन्छन् । हसिनालाई यदाकदा डटर अफ डेमोक्रसी पनि भनिन्छ । हसिनाको राजनीति सन् ८० को दशकमा सुरु भएको हो । उनले सन् १९८६ देखि १९९५ सम्म प्रतिपक्षी नेताको भूमिकामा रहेर काम गरिन् । 

त्यसपछि सन् १९९६ देखि मुलुकको प्रधानमन्त्रीका रुपमा सेवा गरिन् । तथापि सन् १९८१ देखि नै बंगलादेश अवामी लिगको नेतृत्व पनि सम्हाल्दै आएकी छन् । सन् २००८ को आमनिर्वाचनमा उनको दललाई ऐतिहासिक बहुमत प्राप्त भयो र उनी पुनः सरकार प्रमुखका रुपमा सत्तामा आइन् । यसै गरी सन् २०१४ को निर्वाचनमा उनको दल बंगलादेश अवामी लिगलाई फेरि बहुमत प्राप्त भयो र तेस्रो कार्यकालका लागि उनी सत्तामा आइन् ।

हुन त उनको विजय विवादरहित भने रहेन । सन् २०१४ मा विपक्षका सबै दलले निर्वाचन बहिष्कार गरेका थिए भने अन्तर्राष्ट्रिय पर्यवेक्षकको समेत उनले तीव्र आलोचना खेप्नुपरेको थियो । व्यापक विरोध र विवादबीच उनले सन् २०१८ को आमनिर्वाचन पनि ठूलो बहुमतले जित्न पुगिन् । हसिनालाई संसारकै सीमित शक्तिशाली महिलामध्ये एक मानिन्छ । सन् २०१८ को फोब्र्स म्यागाजिनको सय जना शक्तिशाली महिलामध्ये उनी पनि परेकी थिइन् । उनी विश्व महिला नेतृत्व परिषद् सदस्यसमेत हुन् । 

उनको कार्यकाल कहिल्यै विवाद मुक्त रहेन । हरेक पटक ठूलाठूला आर्थिक अनियमिततामा संलग्न रहेको, विपक्षीलाई दमन गरेको, निर्वाचनमा प्रचुर मात्रामा धाँधली गरेको एवं अधिनायकवादी शासन लादेको आरोप उनीमाथि लाग्दै आएको छ ।

उनकै कार्यकालमा पद्मा पुल घोटाला, सोनाली बैंक प्रकरण, सेयर बजार विवाद, राणा प्लाजा दुर्घटना तथा बंगलादेश सडक सुरक्षाका लागि भएका विरोध प्रदर्शनलगायत थुप्रै आर्थिक सामाजिक एवं राजनीतिक विवाद आए । व्यापक गरिबी, बढ्दो जनसंख्या वृद्धि र सुशासन अभावमा बंगलादेश छटपटाइरहेको छ । त्यसमाथि कमजोर पूर्वाधारले विकासको गति सुस्त बनाइदिएको छ । भ्रष्टाचारले बंगलादेश निकै थलिएको छ । 

समग्रमा भने बंगलादेशले उनकै कार्यकालमा प्रशस्त आर्थिक समृद्धि हासिल गरेको छ । उनको कार्यकालमा मुख्यतया आर्थिक पक्ष सबल देखिन्छ । सरदर सात प्रतिशतको आर्थिक वृद्धि गर्ने महत्त्वाकांक्षा लिएको सरकारले लगभग ६.७ प्रतिशतको सरदर वृद्धि हासिल गरी अनौठो सफलता प्राप्त गरेको छ । सन् २०१५–०१६ को प्रक्षेपणअनुसार यो लक्ष्य पूरा गरेको हो । महत्त्वाकाँक्षी लक्ष्यहरुका कारण अन्तर्राष्ट्रिय वित्तीय निगमहरुको तीव्र असन्तुष्टि रहे तापनि लक्षित उद्देश्य पूरा गरेपछि ती संस्थाहरु पनि सन्तुष्ट छन् । व्यापार वाणिज्यमा पनि ठूलो वृद्धि देखिएको छ। ग्लोबल इकोनोमीको तथ्यांकअनुसार सन् २००८ देखि २०१७ सम्म औसत छ प्रतिशतभन्दा माथि नै वृद्धिको रेखा देखिन्छ ।     

यसरी २ खर्ब ५० अर्ब अमेरिकी डलर बराबरको अर्थतन्त्र बनाउन शेख हसिना सरकारको ठूलो भूमिका रहेकामा कुनै विवाद देखिन्न । यसका पछाडि एउटा महत्वपूर्ण कुरा जिम्मेदार छ त्यो हो राजनीतिक स्थिरता । लोकतान्त्रिक प्रक्रियाको निर्वाचनलाई नै प्रयोग गरीजस्तै भए पनि राजनीतिक सामाजिक स्थिरता हासिल भएकै हो। जसले वर्तमान बंगलादेशलाई दक्षिण एसियाको एउटा उदीयमान अर्थतन्त्रका रुपमा विश्वसामु उभ्याउन सफल भएको छ ।  

हसिनाको यो विजय पनि बङ्गलादेशको समग्र उन्नतीमा एउटा कोशेढुङ्गा साबित रहला भन्ने आशा आम श्रमजिवी बङ्गलादेशी जनताको चाहना देखिन्छ ।