कर्मचारी कार्यालय पुगिसकेपछि सार्वजनिक बिदा

काठमाडौं- सरकारले पूर्वसभामुख दमननाथ ढुंगानाको निधनको शोकमा आज सोमबार सार्वजनिक बिदा दिने निर्णय गरेको छ। बिदा भए पनि धेरैजसो कर्मचारी कार्यालय पुगिसकेका छन्। 

कतिपय सेवाग्राहीसमेत कार्यालय पुगिसकेको अवस्थामा बिदा हुँदा समस्या भएको छ। केही कार्यालयमा त कार्यालय खुल्नुभन्दा केही घण्टा अघिदेखि नै लाइन लागेको हुन्छ।

आज बिहान बसेको मन्त्रिपरिषद्को बैठकले सार्वजनिक बिदा दिने निर्णय गरेको हो। ढुंगानाको भने हिजै दिउँसो निधन भएको थियो। सरकारले ढिलो गरी निर्णय गर्दा कर्मचारी र सर्वसाधारणले दुःख पाएका छन्।

सरकारको निर्णय सार्वजनिक हुँदै गर्दा कतिपय कर्मचारी तथा सेवाग्राही कार्यालय पुगिसकेका थिए। राहदानी विभाग, यातायात कार्यालय, जिल्ला प्रशासन कार्यालयहरुमा नौ बजेदेखि नै सेवाग्राहीको भिड लाग्ने गर्छ। यी कार्यालय अचानक बन्द हुँदा समस्या भएको छ।