बझाङबाट अपहरण भएका धनराज तीन दिनपछि पलियाबाट मुक्त

धनगढी- बझाङबाट तीन दिनअघि अपहरणमा परेका एक युवकलाई भारतको पलियाबाट अपहरण मुक्त गरिएको छ। भारतको उत्तर प्रदेशस्थित खिरी जिल्लाको पलियामा लगेर राखिएका बझाङको दुर्गाथली गाउँपालिका- ४ का धनराज जोशीलाई कैलालीका प्रमुख जिल्ला अधिकारी बाबुराम श्रेष्ठको पहलमा अपहरणमुक्त गरिएको हो। 

दुर्गाथली गाउँपालिका अध्यक्ष प्रयागराज जोशीले कैलालीका प्रमुख जिल्ला अधिकारीलाई अपहरण परेका जोशीलाई मुक्त गराईदिन आग्रह गरेपछि प्रशासन प्रहरी शसस्त्र प्रहरी लगायतको समन्वयमा जोशीलाई अपहरणमुक्त गरेर नेपाल ल्याईएको हो। 

उनलाई स्थानीय जनप्रतिनिधिहरुको जिम्मा लगाईएको छ। दुर्गाथली गाउँपालिका ४ का २६ वर्षीय जोशीलाई भारतीय एसएसबीसंग समन्वय गरी अपहरण मुक्त गरेर जन प्रतिनिधिको जिम्मा लगाइएको सशस्त्र प्रहरी वल, नेपाल ३४ नम्बर गण धनगढीका गणपती सशस्त्र प्रहरी नायव उपरीक्षक विष्णु प्रसाद भट्टले जानकारी दिए। 

पलिया घर भएका ५० बर्षीय रेहाना खाँ र जोशीले मिलेर जेसिभी स्काभेटर भाडामा लिएर सञ्चालन गरिरहेका थिए । दुवै बीच केही मतभेद भएछि खाँ ले जोशीलाई घुम्न जाउ भनेर पलिया पुराएर अपहरण गरेको बुझिएको छ।