प्रदेशबाटै श्रम स्वीकृति : वैदेशिक कामदार खुसी

जनकपुरधाम- धनुषाको हंसपुर नगरपालिका बस्ने जलिम नदाफ आइतबार कार्यालय सुरु हुनासाथ जनकपुरस्थित श्रम तथा रोजगार कार्यालय पुगेका थिए । वैदेशिक रोजगारका क्रममा कतारबाट ३/४ महिनाअघि फर्किएका जलिमलाई फेरे त्यतै जानुपर्नेछ । श्रम स्वीकृतिका लागि काठमाडौ जानुपर्ने उनको बाध्यता आइतबारदेखि सकिएको छ ।

यसैगरी धनुषाकै लक्ष्मिनिया गाउँपालिका सोहनीका सिनुरजोडा पनि वैदेशिक रोजगारीका लागि कतार जाँदै छन् । कतारमै श्रम गरिरहेका विनोद पनि तीन महिनाअघि घर आएका थिए । बिदा सकिएकाले फेरि उनलाई कतार जानुपर्नेछ । वैदेशिक रोजगारमा जानुपूर्व चाहिने श्रम स्वीकृति लिन विनोद श्रम तथा रोजगार कार्यालय पुगेका थिए ।

वैदेशिक रोजगारमा जानुपूर्व यसअघि काठमाडौंबाट मात्र पाइने श्रम स्वीकृति आइतबारदेखि प्रदेशमै सुरु भएपछि जलिम र विनोद दुवै खुसी देखिन्थे । सरकारले आइतबारदेखि पहिलोपटक राजधानी बाहिरबाट श्रम स्वीकृति दिन थालेको छ ।

केही घन्टामै पाउन सकिने श्रम स्वीकृतिका लागि वैदेशिक रोजगारमा जाने कामदारलाई ३/४ दिन पहिल्यै काठमाडौं पुग्नुपर्दथ्यो । प्रदेशबाटै श्रम स्वीकृति पाउन थालेपछि जलिम र विनोदजस्तै हजारौं कामदारलाई सहज भएको छ ।

‘विदेशबाट फर्केर फेरि त्यता जाँदा पुनः श्रम स्वीकृति लिनुपर्ने हुन्छ । पुनः श्रम स्वीकृति लिन हामीलाई काठमाडौं पुग्नुपर्दथ्यो,’ जलिमले भने, ‘यो झन्झट सकिएको छ । अब हामी जनकपुरबाटै श्रम स्वीकृति पाउने भएका छौं ।’

केही घन्टामै पाउन सकिने श्रम स्वीकृति लिन दिन चार दिन पहिल्यै काठमाडौं पुग्नुपर्ने झन्झट पनि अब सकिएको उनले बताए ।

जनकपुरस्थित प्रदेश कार्यालयबाटै श्रम स्वीकृति पाउन थालिएपछि वैदेशिक कामदारहरुको खर्च पनि कम भएको छ । यसअघि काठमाडौं पुगेर श्रम स्वीकृति लिन उनीहरुलाई होटलमा खानाखाजा खाँदा अतिरिक्त पैसा खर्च गर्नुपर्थ्यो । 

‘श्रम स्वीकृति लिन दिन चार दिनअघि हामीलाई काठमाडौं पुग्नुपर्ने बाध्यता थियो,’ सोहनीका विनोदले भने, ‘१०/१५ हजार अतिरिक्त खर्च हुने गरेको थियो । तर अब सजिलो भएको छ ।’ श्रम स्वीकृति लिन काठमाडौंमा ४/५ घन्टा लाममा बस्ने समस्यासमेत टरेको उनले बताए ।

सरकारले आइतबारदेखि प्रदेश २ को जनकपुर र प्रदेश ५ को बुटवलबाट पुनः श्रम स्वीकृति दिने व्यवस्था गरेको छ । तत्काल प्रदेश कार्यालयबाट पुनः श्रम स्वीकृति मात्र दिइने भए पनि आगामी दिनमा यससम्बन्धी सम्पूर्ण काम हुने बताइएको छ ।

प्रदेश श्रम तथा रोजगार कार्यालयका निमित्त प्रमुख मनोज यादवले जनकपुरबाट तत्काल पुनः श्रम स्वीकृतीमात्र पाउन सकिने बताए । उनले पहिलोपटक वैदेशिक रोजगारमा जाने कामदारलाई काठमाडौं पुगेर विभागबाटै श्रम स्वीकृति लिनुपर्ने जानकारी दिए ।

प्रदेश कार्यालयबाटै पुनः श्रम स्वीकृति दिने व्यवस्था भएकोले यस क्षेत्रका वैदेशिक कामदारलाई धेरै सहज भएको उनको भनाइ थियो । प्रदेश कार्यालयबाट दैनिक दुई सयदेखि तीन सयलाई पुनः श्रम स्वीकृति दिने आफूहरुले लक्ष्य राखेको निमित्त कार्यालय प्रमुख यादवले बताए ।

वैदेशिक रोजगारसम्बन्धी काम गर्ने म्यान पावर एजेन्सी, मेडिकल हुने स्थान, वैदेशिक रोजगारलाई तालिम दिइने स्थानलगायतका सबै कामको अनुगमन र निरीक्षण गर्ने यादवले जानकारी दिए ।
एक तथ्यांकअनुसार वैदेशिक रोजगारको सवालमा धनुषा मुलुककै अग्रस्थानमा छ । हाल प्रदेश २ को धनुषाबाट मात्र करिब डेढ लाख युवा वैदेशिक रोजगारका लागि विभिन्न मुलुकमा काम गर्दै आइरहेको बताइएको छ ।

वैदेशिक रोजगारमा जानेमध्ये अधिकांश कामदार विभिन्न कारणले ठगीको सिकार हुँदै आइरहे पनि उजुरी गर्ने स्थानबारे जानकार हुन सकेका छैनन् । एजेन्टमार्फत वैदेशिक रोजगारमा जाने अधिकांश कामदार ठगिँदै आएको सामी परियोजनाअन्तर्गत सञ्चालित जनकपुरस्थित सुरक्षित अप्रवासन कार्यालयले जनाएको छ ।