उपप्रधानमन्‍त्री पोखरेलले भने- 'कुरो बुझेर मात्रै लेख्‍नुस्'

काठमाडौं- उपप्रधानमन्त्री एवं रक्षामन्त्री ईश्वर पोखरेलले विषय वस्तु बुझेर मात्रै लेख्न सञ्चारकर्मीसँग आग्रह गरेका छन् । 

नेपाल पत्रकार महासङ्घ, काठमाडौँ शाखाको २०औँ साधारणसभाको उद्घाटन सत्रमा बोल्दै उनले तथ्यको तोडमोड गरेर गलत सुचना प्रवाह गर्ने गरेको भन्दै गुनासो गरे । उनले भने– “सञ्चार क्षेत्रमा लागेकाहरु सत्ता र प्रतिपक्ष हुनु जरुरी छैन । विषयवस्तु र गुण दोष जाँचेर ठिक र बेठिक लेखिदिनुस्, जहाँ जहाँ परे पनि परोस् । उनले थपे, “भएका कमीकमजोरीबारे लेखिएमा धन्यवाद दिन्छौँ तर सत्यसित कुनै साइनो नभएका समाचार सम्प्रेषण गरिनु निन्दनीय हो । यस्तो नहोस् ।” 

उपप्रधानमन्त्री पोखरेलले निजगढ अन्तर्राष्ट्रिय विमानस्थल, काठमाडौँ तराई दू्रतमार्ग निर्माण जस्ता विषयमा कुनै केन्द्रको आग्रह वा भनाइका आधारमा समाचार नदिई विषयवस्तु बुझेर मात्र समाचार सम्प्रेषण गर्न आग्रह गरे । 

उनले नयाँ चुनौतीको सामना गर्न तथा संविधानका राम्रा कुरा कानून र संरचना बनाएर कार्यान्वयनमा जाने सवालमा सहयोग गर्न आग्रह गरे । उनले अन्य सरकार जस्तो सामान्य बहुमतको सरकारको रुपमा यो सरकारलाई नहेर्न पनि सुझाव दिए ।