रहेनन् लोकगायक बुद्धिकृष्ण लामिछाने

काठमाडौं- वरिष्ठ लोकगायक बुद्धिकृष्ण लामिछानेको शुक्रबार निधन भएको छ। मधुमेह र उच्च रक्तचापको समस्याबाट पीडित लामिछानेको ६० वर्षको उमेरमा आफ्नै निवासमा निधन भएको हो।

उनको जन्म २०१५ साउन १ गते भक्तपुर जिल्लाको बागेश्वरी गाविस वडा नं ३ मा भएको थियो। उनका घाँस काट्ने खुर्केर..., गाई त बाँध्ने पाटको दाम्लो..., पिँढीमा बसेर मेरै बाटो हेरेर... बोलका लाकभाका निकै चर्चित छन्। लामिछाने लोकगीत संकलक पनि हुन्।

उनले प्रसिद्ध टेली सिरियल जिरे खर्सानीको केही भागमा अभिनय गरेका थिए। लोक गायन र अभिनयमा पोख्त लामिछानेलाई विदेश लैजाने ठूलो रहर हुँदा हुँदै लान नसिकएकोमा जिरे खुर्सानीका निर्देशक जितु नेपालले दुख व्यक्त गरे।

उनले लोक गायकको रुपमा लामो समय सम्म रेडियो नेपालमा योगदान दिएका छन्। उनको पार्थिव शरीरलाई दाह संस्कारका लागि घाटतर्फ लैजाने तयारी भइरहेको परिवार श्रोतले बताएको छ। उनका श्रीमती, दुई छोरा र तीन छोरी छन्।