राष्ट्रिय गानका रचनाकार व्याकुल माइलालाई पितृशोक

काठमाडौं – राष्ट्रिय गानका रचनाकार एवम् कवि प्रदीपकुमार राई ‘व्याकुल माइला’लाई पितृशोक परेको छ। व्याकुल माइलाका पिता समाजसेवी तथा शिक्षासेवी मानबहादुर राईको ७१ वर्षको उमेरमा ओखलढुङ्गाको हिलेपानीस्थित आफ्नै निवासमा गए राति १ बजे निधन भएको छ। 

उनी विगत केही वर्षदेखि मष्तिस्कमा रगत जम्ने (हेमाटोमा) र मधुमेह रोगको नियमित उपचारमा थिए। पारिवारिक स्रोतका अनुसार केही दिनयता रोगले च्याप्दै गएका राइको गएराति शौचालयबाट फर्केर सुतेलगत्तै निधन भएको हो। 

वि.सं. २००४ साल असोजमा जन्मिएका स्वर्गीय राई २० वर्षसम्म अध्यापन गरेर सेवा निवृत्त पछि सामाजिक सेवामा संलग्न थिए। आर्दश र निष्ठावान व्यक्तिका धनी तथा सामाजिक जीवनमा सधैँ समर्पित स्व. राई गाविस अध्यक्ष तथा ओखलढुङ्गा जिल्ला विकास समितिको सदस्यसमेत भएका थिए। 

पिताको निधनको खबर सुनेलगत्तै ललितपुर तिखिदेवलमा बस्दै आएका व्याकुल माइला र उनकी धर्मपत्नी नानुकला राई शुक्रबार बिहानै ओखलढुङ्गा गएका छन्। स्व राईको जातीय परम्पराअनुसार आजै ओखलढुङ्गामा अन्तिम संस्कार गरिने जनाइएको छ। स्व राईका दुई श्रीमती र व्याकुल माइलासहित तीन छोरा छन्।