मनाङको तापक्रम माइनस २० मा झर्‍याे, १८ घन्टासम्म हिमपात

मनाङ- लगातार परेको हिमपातका कारण मनाङको तापक्रम स्वाट्टै घटेको छ । प्रमुख जिल्ला अधिकारी रुद्रनाथ देवकोटाका अनुसार शुक्रबार बिहान मनाङको तापक्रम माइनस २० मा झरेको छ। 

हिमपातसँगै तापक्रम माइनस २० पुगेपछि स्थानीयको जनजीवन प्रभावित भएको । घरबाट बाहिर निस्किन नसक्ने अवस्था बनेको छ भने विद्यालयहरु बन्द गरिएको प्रमुख जिल्ला अधिकारी देवकोटाले जानकारी दिए । चिसोका कारण खोला कुवा समेत जमेपछि पानीको अभाव भएको उनले बताए । 

मनाङमा बिहीबार दिउँसोदेखि लगातार हिउँ परिरहेको छ । जिल्लाको माथिल्लो भेग खांसार, भीमताङ, गुवाल, मनाङगाउँलगायत ठाउँमा बाक्लो हिउँ परेको प्रमुख जिल्ला अधिकारी देवकोटा जानकारी दिए । अन्य भूभागमा भने पातलो परेको हिउँ परेको छ । 

हिमालको वरिपरि कालो बादल लागेको र हावाहुरी आउनाका साथै हिमपात भएको उनले बताए । लामो समयसम्म आकाशमा बादल लाग्नाका साथै तापक्रम पनि निकै घटेको छ ।

हिजो दिउँसो करीब १ बजेबाट शुरु भएको हिमपात बिहान ७ बजे रोकिएको माथिल्लो मनाङका गोरे गुरुङले बताए । हिमपातले जनमानसमा कुनै असर भने नगरे पनि चिसो भने बढेको छ । अहिले भने हिमपात रोकिएको छ । 

झन्डै १८ निरन्तर हिमपात भएको थियो । जल तथा मौसमविद् बरुण गौडेलका अनुसार आज दिनभर मौसममा बदली हुने, साँझपख पुनः हिमपात हुनसक्ने र भोलिबाट मौसममा सुधार आउने सम्भाबना देखिन्छ ।