सरकारविरुद्ध आन्दोलन गर्ने ‘एचए’ को तयारी

जनकपुरधाम- सरकारले बढुवाको नाममा स्वास्थ्य क्षेत्रलाई बिगार्ने काम गरेको भन्दै प्रदेश २ मा कार्यरत हेल्थ एसिसटेन्ट (एचए) हरुले आन्दोलनको चेतावनी दिएका छन्। 

राज्यले एचए पदमा आफ्नै ढंगले केही कर्मचारीहरुलाई बढुवा गर्ने आन्तरिक तयारी गरेको भन्दै उनीहरुले आन्दोलनको चेतावनी दिएका हुन् । बिहिबार जनकपुरमा प्रदेशस्तरीय हेल्थ एसिसटेन्टहरुको भेलामा बोल्दै उनीहरुले राज्यले कर्मचारी बढुवाको नाममा राज्यले स्वास्थ्य क्षेत्र र कर्मचारी बिगार्ने खेलमा लागेको आरोप लगाएका छन्।

प्रदेश २ का सामाजिक विकासमन्त्री नवलकिशोर साहसमेत उपस्थित रहेको कार्यक्रममा हेल्थ एसिसटेन्ट संघका कार्यबाहक अध्यक्ष दिपेन्द्र खड्काले कर्मचारी बढुवासम्बन्धी सरकारले लिएको नीतिको विरोधमा आन्दोलनका लागि तयार रहन आग्रह गरेका छन् । कर्मचारी मिलान गर्दा योग्यता र अनुभव दुबै कुरालाई ध्यानमा राखेर बढुवा गरिनुपर्ने उनको भनाइ थियो ।

सामाजिक विकास मन्त्री साहले एचएहरुका हकहितका लागि प्रदेश सरकार सदैव तयार रहेको बताए। प्रदेश २ लाई स्वास्थ्य क्षेत्रको नमूना प्रदेश बनाउने आफ्नो लक्ष्य रहेको बताउँदै मन्त्री साहले राम्रो संगठन बनाएर स्वास्थ्य क्षेत्रमा अलग पहिचान बनाउन एचएहरुलाई आग्रह गरे।

प्रदेश २ का स्वास्थ्यकर्मीहरु मुलुकभर छरिएर रहेपनि आफ्नै प्रदेशमा सेवा दिन नसकेको मन्त्री साहको गुनासो थियो । भेलामा प्रदेश २ का आठै जिल्लाका एचएहरुको सहभागिता रहेको थियो।