यस्तो बन्‍ने भयो धरहरा, आज शिलान्यास हुने

काठमाडौं- भूकम्पमा परि भत्किएको ३ वर्ष ८ महिनापछि धरहरा पुनर्निमाणको काम सुरु हुने भएको छ। प्रधानमन्त्री केपीशर्मा ओलीले बिहीबार पुनर्निमाणको सुरुवात गर्दैछन् । 

बिहान ११ धरहराको सिलन्यास गर्ने कार्यक्रम रहेको राष्ट्रिय पुनर्निमाण प्रधिकरणका सूचना अधिकारी मनोहर घिमिरेले जानकारी दिए । धरहरा निर्माणका लागि पटक पटक प्रयास भएपनि ३ वर्ष ८ महिना पछि बल्ल यसको पुननर्निमाण हुन लागेको हो । 

धरहरा परिसरलाई कम्पाउण्डिङ गर्ने, भत्किएको धरहरालाई संरक्षण गर्नेलगायतका काम भइसकेका छन्। पुनर्निर्माण प्राधिकरणले जीआईईटीसी–रमन जेभीलाई धरहरा पुनर्निर्माणको जिम्मा दिएको छ। कम्पनीले तीन अर्ब ४५ करोड रुपैयाँमा धरहरा निर्माणको जिम्मा पाएको छ । सरकारले आफ्नै लगानीमा बनाउन लागेको धरहरा २४ तलाको हुनेछ । 

यस्तो बन्ने छ धरहरा

प्राधिकरणले सार्वजनिक गरेको डिजाइन अनुसार नवधरहराले करिब ४२ रोपनी क्षेत्रफल समेट्नेछ । त्यसमा हालको टक्सार विभाग, गोश्वारा हुलाक र सुन्धाराको क्षेत्रलाई पनि धरहराकै परिसरमा समेटिने योजनामा रहेको छ ।

नयाँ धरहराका डिजाइन केज कन्सुलेट प्रालि र एमआरबी एण्ड एशोसिएट्सले तयार पारेको हो । उक्त डिजाइन अनुसार नयाँ बन्ने धरहरामा जमिनमुनि दुई र जमिनमाथि २२ तला गरी जम्मा २४ तलाको हुनेछ । तर बाहिरबाट हेर्दा ११ तलाजस्तो मात्र देखिनेछ । क्षतिग्रस्त धरहराको ठुटो भागलाई भने माथि छत राख्नुका साथै चारैतिरबाट १० मिलिमिटरको ‘टेम्पर ग्लास’ ले घेरिनेछ ।

नवधरहरामा माथिल्लो भागसम्म पुग्न र ओर्लनका लागि दुई वटा अत्याधुनिक लिफ्ट जडान गरिनेछ । धरहराको अठारौँ तलामा १७ जनासम्म अट्ने सानो थिएटर बनाइनेछ जहाँ धरहराको विगतदेखि वर्तमानसम्मको श्रव्यदृश्य प्रस्तुत हुनेछ । करिब २४५ फिट अग्लो धरहराको सबैभन्दा माथिल्लो भागमा सीसाले घेरिएको ‘भ्यू डेस्क’ निर्माण गरिनेछ जहाँबाट काठमाडौँ उपत्यकाको दृश्यावलोकन गर्न सकिनेछ ।

नेपालका प्रथम प्रधानमन्त्री भीमसेन थापाले महारानी त्रिपुरासुन्दरी देवीको सम्झनामा निर्माण गराउनुभएको धरहरा ११ तलाको थियो । १९९० सालको भुइँचालोले २ तला भत्किएपछि पुनर्निर्माण गर्दा ९ तलामा सीमित हुन पुगेको थियो । त्यसको उचाइ २०३ फिट मात्र थियो । धरहरामा चढ्नका लागि २१३ वटा सिँढी थिए ।