कालीकोटमा भिषण आगलागी, ४७ घर जले, ४ घाइते

कालिकोट- कालिकोटमा भएको भिषण आगलागीमा परि ४७ घर जलेर नष्ट भएका छन् । पलाता गाउँपालिका वडा नं. १ को खाडा गाउँस्थित न्यौपानेबस्ती सोमबार बिहान लागेको आगोमा परी ४ जना घाइते भएका छन् । 

घटनास्थलमै रहेकी तलाता गाउँपालिकाका उपाध्यक्ष दाना न्यौपानेले दिएको जानकारी अनुसार ६५ वर्षिय दिप न्यौपाने ६५ वर्षकै, लाल न्यौपाने, ५० वर्षिया औली न्यौपाने र ४२ वर्षिया चैती न्यौपाने घाइते भएका छन् । आगलागीमा पारी सयौं पशु चौपाएको मृत्यु भएको छ । 

नविन न्यौपानेको र मेगी न्यौपानेको घरको विचभागबाट सुरु भएको आगोले बस्तीनै सखाप पारेको छ । खरले छाएका घरहरु भएकारण क्षणभरमै बस्तीनै आगो सल्कीएको उपाध्यक्ष न्यौपानेले जानकारी दिइन ।

करिव साढे २ बजेतिरबाट सुरुभएको आगो भर्खरै नियन्त्रणमा लिएको छ । तर भौतिक क्षतिको भने एकिन विवरण भने आउने बाँकी रहेको छ । ‘आगो नियन्त्रणमा आयो तर क्षतिको विवरण संकलन गर्दैछौँ ।’ उपाध्यक्षले भनिन ‘घाइतेलाई उपचारका लागि बाहिर लैजाना समस्या भएको छ ।’

यस्तै घटनाका घाइतेलाई उपचार र उद्धारका लागि गाउँपालिकाका अध्यक्ष लक्ष्मणबहादुर बमले पनि प्रदेश सरकारलाई गुहार गरिरहेको बताए । ‘म अहिले मन्त्रालयमै छु, राहत र उद्धारमा सहयोग गरिदिन मन्त्रीसँग कुरा गरेको छु ।’ अध्यक्ष वमले भने ‘उद्धारका लागि हेलि (हेलिकप्टर) मगाउने प्रयत्न भैरहेको छ ।’ यता घटनाको जानकारी पाए लगत्तै जिल्ला प्रहरी कार्यालयको टोली घटनास्थल पुगेको छ । आगलागी भएको ठाउँ सदरमुकामदेखि करिब ३२ कोष टाढा पर्दछ ।