आज उपाधिका लागि ललितपुर र भैरहवा भिड्दै

काठमाडौं- एभरेष्ट प्रिमियर लिग (इपीएल) टी-२० क्रिकेटको उपाधिका लागि शनिबार ललितपुर प्याट्रियट्स र भैरहवा ग्लाडीयटर्सबीच भिडन्त हुँदै छ । त्रिवि क्रिकेट मैदानमा खेल दिउँसो १२ः३० बजेबाट सुरु हुँदै छ । 

शरद भेषावकरको कप्तानीमा रहेको भैरहवा र ज्ञानेन्द्र मल्लको कप्तानीमा रहेको ललितपुर दुबै टोलीको लक्ष्य तेस्रो संस्करणको इपीएलको उपाधि जित्ने हुनेछ । भैरहवा साविकको उपविजेता टोली पनि हो । 

भैरहवा लिग चरणमा ललितपुरसँग ६ विकेटले पराजित भएको थियो । लिग चरणमा भैरहवाले दिएको ९२ रनको सामान्य लक्ष्य ललितपुरले १४.२ ओभरमा मात्र ४ विकेट गुमाउदै भेट्टाएको थियो । 

त्यसैले भैरहवा उक्त हारको बदला लिँदै प्रतियोगिताको उपाधि उचाल्ने दाउँमा हुने छ । यता ललितपुर भने लिग चरणमा पराजित गरेको उच्च मनोबलका साथ मैदान उत्रिने छ ।
दुबै टोली क्वालिफायरमा काठमाडौ किङ्ग इलेभेनलाई पराजित गर्दै फाइनल प्रवेश गरेका हुन् ।

भैरहवाले इलिमिनेटरमा पृथु बास्कोटाको टिम चितवन टाइगर्सलाई ४ विकेटले पराजित गर्दै दोस्रो क्वालिफायरमा स्थान बनाएको थियो । प्रतियोगिताको विजेताले २५ लाख तथा उपविजेता १० लाख नगद पाउने छन् । 

त्यस्तै प्रतियोगिताको प्येलर अफ दि सिरिजले टिभीएस अपाचे बाइक पाउने छन् । आयोजकले यस संस्करणको विजेताले पाउने रकममा वृद्धि गरेको छ । गत संस्करणको विजेता टोलीलले २१ लाख प्राप्त गरेको थियो ।