आजका अखबार : वायु प्रदूषणले सासै फेर्न सकस 

काठमाडौं- राजधानीबाट प्रकाशित शनिबारका राष्ट्रिय दैनिक अखबारहरुले दाङको तुलसीपुरमा बस दुर्घटना हुँदा २२ जनाको मृत्यु भएको विषयलाई मुख्य समाचार बनाएका छन् । 

शैक्षिक भ्रमण गरि सल्यानबाट दाङ फर्किएको बस दुर्घटना हुँदा २२ जनाको मृत्यु भएको छ। दुर्घटनामा १५ जना घाइते भएका छन् । ब ४ ख ९७६६ नम्बरको बस दाङ तुलसीपुर उपमहानगरपाािलका वडा नम्बर ३ राम्री भन्ने स्थानमा दुर्घटनामा परेको हो । प्रहरीका अनुसार बसमा ३४ विद्यार्थी, दुई शिक्षक र एक चालक गरी ३७ जना थिए ।

यसै वर्षदेखि घोराहीमा सञ्चालित कृष्ण सेन इच्छुक पोलिटेक्निकल इन्स्टिच्युटका वनविज्ञान विषयका विद्यार्थी र शिक्षक सल्यानको छायाछेत्रमा वनस्पतिसम्बन्धी प्रयोगात्मक अभ्यासका लागि शुक्रबार बिहान गएका थिए । फर्कने क्रममा बस सडकबाट ७ सय मिटर तल खसेको प्रहरीले जनाएको छ । 

यसै विषयलाई मुख्य समाचार बनाउँदै आजको कान्तिपुर दैनिकले शैक्षिक भ्रमणको बस खस्योः २२ को मृत्यु, १५ घाइते शीर्षकमा खबर छापेको छ । अन्नपूर्ण पोस्ट्ले पनि बस दुर्घटना २२ को मृत्यु शीर्षकमा खबर लेखेको छ । नयाँ पत्रिकाले पनि २२ को मृत्यु भएको उल्लेख गरेको छ भने आजको नागरिक दैनिकले २१ जनाको मात्रै मृत्यु भएको खबर छापेको छ ।  

यो दुखद दुर्घटनाको खबरसँगै आजका पत्रपत्रिकाले अरु विषयलाई पनि प्राथमिकताकामा पारेका छन् । नागरिक दैनिकले उपत्यकामा बढेको वायु प्रदुषणका कारण सासै फेर्न सकस हुने अवस्था आएको विषयलाई मुख्य समाचार बनाएको छ ।

विश्व स्वास्थ्य संगठनका अनुसार नेपालमा वायु प्रदुषणका कारण लाग्ने रोगबाट प्रत्येक वर्ष १० हजारको मृत्यु हुने गरेको समाचारमा उल्लेख छ । यस्तै नागरिकले फैसला थाहा नभएको बाहानामा मनाङे जेलमुक्त शीर्षकमा विशेष खबर छापेको छ । 

कान्तिपुरले खुलेन मलेसिया शीर्षकमा विशेष खबर लेखेको छ ।  समाचारमा उल्लेख भए अनुसार जेठदेखिको प्रतिबन्ध खुल्न नसक्दा १० हजार युवा कलिङ भिसा बोकेर उड्ने दिनको पर्खाइमा छन् । श्रम सम्झौता भएको २ महिना बितेपनि अझै मलेसिया कामदारका लागि नखुल्दा हजारौ युवाहरुले समस्या झेल्नु परेको समाचारमा जनाइएको छ । 

अन्नपूर्णले भने रवि ओड दोस्रो नेपाल आइडल बनेको विषयलाई मुख्य समाचार बनाएको छ । उसले क्यारिकेचर र हास्यव्यंगका नाममा आत्मासम्मानमा घोचपेच गर्ने गरिएको विषयलाई पनि पहिलो पृष्ठमा स्थान दिएको छ ।