शैक्षिक भ्रमणको बस दुर्घटना : २२ जनाको मृत्यु, ५ घाइते (अपडेट)

लमही- सल्यानको कपुरकोटबाट तुलसीपुरतर्फ आउँदै गरेको बा४ ख ९७६६ नम्बरको बस तुलसीपुर-सल्यान सडकखण्डको तुलसीपुर-३ राम्रीमा बिहीबार बस दुर्घटना हुँदा २२ जनाको मृत्यु भएको छ। ५ जना घाइते भएका छन्। 

ज्यान गुमाएका २२ मध्ये ५ जनाको सनाखत भएको छ । जसमा बस चालक घोराही उपमहानगरपालिका वडा नं ३ का मदन केसी,  शहिद कृष्णसेन इच्छुक बहप्राविधिक शिक्षालयका शिक्षकहरू घोराही उपमहानगरपालिका– १७ का २८ वर्षीय प्रदीप घिमिरे र पूर्वी रुकुमको भुमे गाउँपालिकाका २८ वर्षीय नरेश वली रहेका छ्न ।

दुर्घटनामा परेर दाङको दंगीशरण गाउँपालिका– १ का  सञ्जित रत्गैया, घोराही उपमहानगरपालिका– १४ का २७ वर्षीय बिजय जीएमको ज्यान गएको छ । अन्यकाे सनाखत हुन नसकेकाे  प्रहरीले जनाएको छ । बसमा शिक्षालयका ३२ जना विद्यार्थी, २ जना शिक्षक र ३ जना बसका कर्मचारीसहित ३७ जना यात्रु रहेको प्रहरीले जनाएको छ ।

यसै वर्षदेखि घोराहीमा सञ्चालित कृष्ण सेन इच्छुक पोलिटेक्निकल इन्स्टिच्युटका वनविज्ञान विषयका विद्यार्थी र शिक्षक सल्यानको छायाछेत्रमा वनस्पतिसम्बन्धी प्रयोगात्मक अभ्यासका लागि शुक्रबार बिहान गएका थिए । फर्कने क्रममा बस सडकबाट ७ सय मिटर तल खसेको प्रहरीले जनाएको छ । 

प्रहरी सहायक निरीक्षक विष्णु श्रेष्ठका अनुसार घाइतेलाई उपचारका लागि राप्ती अञ्चल अस्पताल तुलसीपुर लगिएको छ। गम्भीर घाइते दुई जनालाई उपचारका लागि नेपालगञ्ज पठाइएको छ।