केईको ‘एक्स–३ प्रो ईभी’ बुकिङ खुला

काठमाडौं- केई मोटर्सको आधिकारिक वितरक लक्ष्मी ई–मोबिलिटी प्राइभेट लिमिटेडले केईको इलेक्ट्रिक एसयूभी एक्स–३ प्रोको बुकिङ खुला गरेको छ।

कम्पनीले काठमाडौंको भाटभटेनीमा रहेको सुविधा सम्पन्न शोरुमबाट बुकिङ खुला गरेको हो। सुरुमा एक्स–थ्री प्रो मोडल दुई भेरियन्टमा बुकिङ खुला गरिएको कम्पनीले जनाएको छ।

कम्पनीका अनुसार अहिले केई एक्स–३ प्रोको डिलक्स र फ्ल्यागसिप भेरिएन्ट उपलब्ध हुनेछ। इन्टोडक्टरी प्राइसको हिसाबले डिलक्स भेरिएन्टको मूल्य ४६ लाख ९६ हजार र फ्ल्यागसिप भेरिएन्टको ४८ लाख ९६ हजार रुपैयाँ तोकिएको कम्पनीले जनाएको छ।

कटिङ एज टेक्नोलोजी, स्लिक डिजाइन र उत्कृष्ट पर्फमेन्स दिनसक्ने एक्स–३ प्रो मोडल कम्प्याक्ट एसयूभी सेग्मेन्टमा शान्दार मोडल बन्ने कम्पनीले विश्वास लिएको छ। यसमा ५३.६ किलोवाट आवर क्षमताको लिथियम आयोन फस्फेट ब्याट्री र १२० किलोवाट क्षमताको मोटर रहेको छ। यसको अधिकतम टर्क २८० एनएम छ।

सीएलटीसीका अनुसार यसले सिंगल चार्जमा ४०१ किलोमिटर रेन्ज दिनेछ। यसलाई ७ किलोवाट क्षमताको एसी चार्जरले ८ घण्टामा फुल चार्ज गर्न सकिन्छ। १०० किलोवाटसम्मको चार्जर सपोर्ट गर्ने एसयूभीलाई ३० मिनेटमा ३० देखि ८० प्रतिशतसम्म चार्ज गर्न सकिन्छ।

कम्प्याक्ट एसयूभी सेग्मेन्टमा आउने एक्स–३ प्रो मोडलको लम्बाई ४ हजार ४०० मिलिमिटर, चौडाइ १ हजार ८३१ मिलिमिटर र उचाइ १ हजार ६५३ मिलिमिटर रहेको छ।

५ सिट क्षमताको एसयूभीमा २ हजार ६३२ एमएम लामो ह्विलबेस रहनेछ। यसको अगाडि म्याकफेर्सनको इन्डिपेन्डेन्ट सस्पेन्स प्रयोग भएको छ। पछाडि भने मल्टी लिंक इन्डिपेन्डेन्ट सस्पेन्स दिइएको छ। यसमा १८३ एमएमको ग्राउन्ड क्लियरेन्स छ। ग्राहकले यसमा विभिन्न ५ कलर अप्सन पाउने कम्पनीको भनाइ छ।

वातावरण मैत्री इलेक्ट्रिक एसयूभीको पर्फमेन्ससँगै स्लिक डिजाइन र मोर्डन फिचर छन्। केई एक्स–३ प्रोमा प्रयोग भएका सम्पूर्ण लाइटहरू एलईडी छन्। १०.२५ इन्चको आधुनिक इन्फोटेन्टमेन्ट सिस्टम, ७ इन्चको एलसीडी इन्फर्मेसन क्लस्टर, इन्टेलिजेन्ट स्काइरूफ, ड्यूल जोन एसी, वायर लेस चार्जर, पावर एड्जस्टेवल ड्राइभर सिट रहेको छ।

चालकलाई पृथक ड्राइभिङ अनुभव प्रदान गर्न सक्ने किसिमले डिजाइन गरिएको एक्स–३ प्रो सुरक्षाको हिसाबले पनि उत्कृष्ट रहेको कम्पनीले जनाएको छ। एयरब्याग, ३६० डिग्री क्यामेरा, टायर प्रेसर मोनिटरिङ सिस्टमसँगै एडास फिचर यसमा छन्।

कम्पनीका अनुसार एडासभित्र विशेष गरी हिल होल्ड एसिस्ट, हिल डिसेन्ट कन्ट्रोल, क्रुज कन्ट्रोल, इबीडी सहितको एबीएस ट्रयाक्सन कन्ट्रोल सिस्टम छन्। यसको ब्याट्रीमा पनि कटिङ एज टेक्नोलोजीको प्रयोग गरिएको छ। सुरक्षाको हिसाबले राम्रो रहेको ब्याट्रीसहित सबै किसिमका मोटर लगायत इलेक्ट्रिकल कम्पोनेन्टमा ८ वर्षको वारेन्टी रहेको छ।