मनसुन कोशी प्रदेशमा सक्रिय, अन्यत्र फैलिँदै

काठमाडौं- एक साताअघि नेपाल भित्रिएको मनसुन पूर्वमा सक्रिय भएको छ भने अन्य प्रदेशमा फैलिने क्रममा छ। देशभर मनसुन फैलिन अझै एक साताभन्दा बढी समय लाग्ने जल तथा मौसम विज्ञान विभाग मौसम पूर्वानुमान महाशाखाले जनाएको छ।

अहिले मनुसन कोशी प्रदेशको पूर्वी र उत्तरी भेगमा केन्द्रित छ। मनसुन फैलिएको क्षेत्र अर्थात् कोशी प्रदेशका सबैजसो जिल्लामा वर्षा भइरहेको छ। मोरङ र झापाका विभिन्न स्थानमा भारी वर्षा भएको छ। पछिल्लो चार घण्टामा मोरङको लेटाङ, झापाको दमक, कन्काइ र अनारमनी बिरता वर्षामापन केन्द्र र आसपासको क्षेत्रमा मध्यमदेखि भारी वर्षा भइरहेको बाढी पूर्वानुमान महाशाखाले जनाएको छ। 

यी क्षेत्रमा थप वर्षा हुनसक्ने भएकाले स–साना खोलाहरूमा बहाव बढ्न सक्ने महाशाखाले जनाएको छ । यी क्षेत्रका नदी तटीय क्षेत्रमा सतर्कता अपनाउन महाशाखाले आग्रह गरेको छ । 

मनसुनको गति सुस्त भएकाले काठमाडौं आइपुग्न अझै केही दिन लाग्ने मौसमविद्को भनाइ छ। अघिल्लो वर्षको मनसुन देशभर फैलिन करिब तीन हप्ता लागेको थियो। गण्डकी प्रदेश र सुदूरपश्चिम प्रदेशमा पश्चिमी वायुका साथै स्थानीय वायुको प्रभावले नयाँ प्रणालीको विकास भए पनि वर्षा प्रभावकारी हुन सकेको छैन। 

गण्डकीको पोखरा आसपास र सुदूरपश्चिमको दार्चुलामा मात्रै हल्का वर्षा भइरहेको छ। मधेस र बागमती प्रदेशमा आंशिक बदली रहेको छ। बागमती प्रदेशका एक-दुई स्थानमा मात्रै हल्का वर्षा भएको छ।