पौष ७ र ८ मा जनकपुरमा मैथिली सम्मेलन हुने

जनकपुरधाम- जनकपुरमा अन्तर्राष्ट्रिय मैथिली सम्मेलन हुने भएको छ । अन्तर्राष्ट्रिय मैथिली सम्मेलन नामक संस्थाको आयोजना र मैथिली साहित्य उत्सव समाजको सह–आयोजनामा ७ र ८ पौषका दिन जनकपुरमा चौथौं पटक सम्मेलन हुन लागेको हो ।

दुई दिनसम्म चल्ने सम्मेलनमा मैथिली भाषा, साहित्य र संस्कृतिबारे वृहद् रुपमा छलफल गरिने सम्मेलनबारे जानकारी दिन विहिबार आयोजना गरिएको पत्रकार सम्मेलनमा संयोजक रामभरोस कापडिले जानकारी दिए ।

कापडिले सम्मेलनमा मैथिली तथा भोजपुरी साहित्यमा योगदान दिएका व्यक्तित्वहरुलाई मिथिला रत्न, मिथिला श्री, अन्तर्राष्ट्रिय सदभावजस्ता सम्मानबाट सम्मानित गरिने बताएका छन् । उनका अनुसार मैथिली तथा नेपाली गायनमा ख्याति कमाएका रमा मण्डल, मैथिली भाषामा पहिलो पटक जनकपुरमा नाटक सुरु गरेका स्वर्गीय योगेन्द्र साह नेपाली र भारत विहार लदनीयाका डा.जयनारायण यादवलाई मिथिला रत्नले पुरस्कृत गर्ने कार्यक्रम रहेको छ ।

यसैगरी भोजपुरी साहित्यमा दखल राखेका विहार पटनाका गोपाल अस्कलाई मिथिला श्री र  मुम्बईका दिपक झालाई अन्तर्राष्ट्रिय सदभाव सम्मान प्रदान गरिने कापडिले जनाए ।

सम्मेलनकै क्रममा भाषाविद् डा.रामअवतार यादवले मैथिली भाषा, देवेन्द्र मिश्रले प्रदेश २ मा मैथिली शिक्षाको अवस्था, गोपाल अस्कले भोजपुरी भाषा साहित्य, संजय साह यात्रीले बज्जिका र तारानन्द मिश्रले प्रदेश २ मा पुरातत्वको अवस्थाबारे कार्यपत्र प्रस्तुत गर्ने पत्रकार सम्मेलनमा जानकारी दिइएको छ ।

सम्मेलनमा विराटनर, राजविराज, मलंगवासहित भारतको मुम्बई, कोलकत्ता, दिल्ली, पटना, दरभंगा, मधुबनीबाट करिब १ सय ५० जनाको सहभागिता रहने आयोजकले जनाएको छ ।

प्रदेश २ मा अनावश्यक रुपमा उठाइएको भाषासम्बन्धी विवादलाई सहजीकरण गर्न सम्मेलनले सहयोग गर्ने संयोजक कापडिले विश्वास व्यक्त गरेका छन् ।

मैथिली भाषा खास जातविशेषको रहेको भनि लागि रहेको आरोपमा कुनै सत्यता नरहेको भन्दै उनले भने,‘मैथिलीको आफ्नै लिपी र साहित्य छ । यसको इतिहास ७÷८ सय वर्ष पुरानो छ । मैथिली भाषालाई समाप्त पार्न जर्बजस्ती प्रदेश २ मा विवाद सृजना गरिएको छ ।’

केहि व्यक्तिले आफ्नो राजनीतिक उद्देश्य पुरा गर्ने धेयले प्रदेश २ मा मगहीको कुरा उठाएर द्धन्द्ध सृजना गर्न खोजेको उनको आरोप छ । भारतको पटना क्षेत्रमा बोलिने मगही यहाँको भाषा हुनै नसक्ने उनको दाबी थियो । राज्यबाट मातृभाषाले पाउनुपर्ने प्रतिष्ठा र उचित सम्मान उपलब्ध गराउने उद्देश्यले सम्मेलनको आयोजना गरिएको कापडिले बताए ।