देउवा सहमतिबाट पछि हट्दा महासमिति बैठक नै अन्योलमा

 काठमाडाैं- सभापति शेरबहादुर देउवा पूर्वसहमतिबाट पछि हटेसँगै कांग्रेसभित्र  पदाधिकारी विवाद फेरि बल्झिएको छ । 

विवाद बढेसँगै महासमिति बैठकमा विधान मस्यौदा पेश हुन सकेकाे छैन । बैठक सुरु भएको पाँच दिन बिते पनि अहिलेसम्म विधान संसोधन प्रस्ताव पेश हुन नसक्दा सदस्यहरु अन्योलमा परेका छन् । 

शीर्ष नेताहरुको विवादका कारण बैठक नै अघि बढ्ने हो वा हैन भन्ने विषयमा आफूहरु अन्योलमा परेको एक सदस्यले नेपाल समयलाई बताए । नेतृत्वको अर्कमणीयताका कारण आफूहरु अन्योलमा फसेको उनको भनाइ थियो । बिहीबारबाट पार्टी कार्यालय सानेपामा बैठक सुरु हुने भनिएको छ । तर, विधानमा सहमति नजुट्दा बैठक कतिखेर बस्ने भन्ने निक्र्योल हुन सकेको छैन् । 

शीर्ष नेताहरुले आफ्नो पद र गुट बलियो हुने गरि मात्रै सहमति गर्ने र गरेको सहमति पनि भाँडिन थालेपछि उनीहरु आक्रोशित बन्न थालेका छन् । महासमिति सदस्यहरुले विधान संसोधन प्रस्ताव पेश नगरेसम्म छलफल नै अगाडी नबढाउने अडान लिएका छन् ।

बुधबार बसेको केन्द्रीय कार्यसमितिको बैठकमा संस्थापनपाक्षीय नेताहरुले उपसभापति, महामन्त्री र सहमहामन्त्रीमा एक एक कोटा समावेशी छुट्याउनु पर्ने अडान राखेपछि मंगलबार राति भएको सहमति भाँडिएको थियाे । 

बुधबारको केन्द्रीय कार्यसमिति बैठकमा महामन्त्री एवं विधान संशोधन मस्यौदा समितिका संयोजक पूर्णबहादुर खड्काले ल्याएको प्रस्तावमा देउवा पक्षीय केन्द्रीय सदस्यहरुले समावेशी नभएको भन्दै विरोध गरेका थिए । फरमुल्लाह मन्सुर, मानबहादुर विश्वकर्मा, सीता गुरुङ, वीरबहादुर बलायर, किशोर सिंह राठोर, एनपी साउदले सहमति समावेशी नभएको भन्दै विरोध गरेका हुन् । 

समावेशी बनाउने प्रयास गरेकोमा सभापति देउवालाई धन्यवाद दिँदै उनीहरुले अर्को समूहलाई समोवशी विरोधीका रुपमा प्रस्तुत गरे । सभापति निकट नेताहरुले समावेशीताको मुद्दा उठाएपछि वरिष्ठ नेता रामचन्द्र पौडेल र कृष्ण सिटौला समूहले सभापतिबाटै धोका भएको भन्दै आपत्ति जनाएका छन् ।

मंगलबार मात्रै कोषाध्यक्ष र पार्टी प्रवक्ता बाहेकका पदाधिकारी निर्वाचि हुने सहमति गरेको थियो भने एक सभापति, दुई उपसभापति, दुई महामन्त्री र दुई सहमहामन्त्री राख्ने समझदारी भएको थियो । तर, यो समझदारी २४ घण्टा नबित्दै भाडिएपछि महासमिति बैठक नै अन्योलताको भूमरिमा फसेको छ।