महासमितिमा भाँडभैलो, ‘शीर्ष सहमति’लाई केन्द्रीय सदस्यले मानेनन्

काठमाडौं– कांग्रेसका केन्द्रीय पदाधिकारी र संख्याको विषयमा भएको सहमति भाँडिएपछि महासमिति बैठक अन्योलमा परेको छ । कांग्रेसका शीर्ष नेताहरुले गरेको सहमति केन्द्रीय सदस्यले नमानेपछि बैठक भाँडिएको हो।

मंगलबार शीर्ष नेताबीचको बैठकमा भएको सहमतिका विषयमा बुधबार केन्द्रीय सदस्यहरुले विरोध जनाएपछि बैठक अन्योलमा परेको हो । 

मंगलबार शीर्ष नेताहरुबीचको बैठकमा एक सभापति, दुई उपसभापति, दुई महामन्त्री, दुई सहमहामन्त्री निर्वाचित गर्ने र एक कोषाध्यक्ष तथा एक प्रवक्ता मनोनित गर्ने सहमति भएको थियो । 

तर, बुधबार दिउँसो बसेको केन्द्रीय कार्यसमितिको बैठकमा भने केन्द्रीय सदस्यहरुले पदाधिकारीहरुमा समानुपातिक प्रतिनिधित्व चाहिन्छ भनेर माग गरेका छन् । पदाधिकारीमा समानुपातिक प्रतिनिधित्वको माग गर्ने सभापति शेरबहादुर देउवा पक्षधर केन्द्रीय सदस्य छन् ।

थप पढ्नुहोस्, सोचेजस्तो भएन 'महासमिति' 

बैठकमा मनबहादुर बस्नेत, वीरबहादुर बलायर, महेन्द्र यादव लगायतले पदाधिकारीले समानुपातिक प्रतिनिधित्वको माग गरेका थिए । 

शीर्ष नेताहरुको सहमतिमा केन्द्रीय सदस्यले विरोध गरेपछि बैठक साँझ ६ बजेसम्मका लागि स्थगित गरिएको कांग्रेस केन्द्रीय सदस्य मीन विश्वकर्माले नेपाल समयलाई जानकारी दिए । 

केन्द्रीय समितिको बैठकका कारण नौ बजे सुरु भएको महासमिति बैठक १२ बजे स्थगित भएको थियो । अब फेरि बैठक बोलाउने तयारी भएको बताइएको छ ।