महासमितिमा आज पनि विधान पेश नहुने 

काठमाडा‌ैं- नेपाली कांग्रेसको जारी महासमिति बैठकमा बुधबार पनि विधान संसोधन प्रस्ताव पेश नहुने भएको छ । कार्यदलले मंगलबार साँझ प्रस्तावित विधानमा सहमति जुटाएपनि छपाई हुन नसकेका कारण बुधबारको बैठकमा विधान पेश हुन नसक्ने भएको हो ।

छपाई सकेर बिहीबार मात्रै विधान संसोधन प्रस्ताव पेश गर्ने तयारी छ । शनिबारबाट सुरु भएको महासमिति बैठकमा विधान संसोधन प्रसताव पेश नहुदा महासमिति सदस्यहरु अन्योलमा पर्दै आएका थिए । उनीहरुले सोमबारदेखि नै विधान पेश गर्न नेतृत्वलाई दबाब दिएका थिए । 

बुधबार विधान पेश नभएपनि राजनीतिक, संगठनात्मक, आर्थिक नीति सम्बन्धी र पार्टीको आन्तरिक आय–व्यय सम्बन्धी प्रतिवेदनमा छलफल हुँदै छ । समुह समुहमा प्रतिवेदनमाथि छलफल गर्दै त्यसका विषयमा बोल्ने कार्यक्रम रहेको प्रवक्ता विश्वप्रकश शर्माले जानकारी दिए । उनका अनुसार महासमिति सदस्यको सुझाव पछि प्रतिवेदन पारित गरिने छ । 

यस्तै कांग्रेसमा १६१ केन्द्रीय कार्यसमिति र ८ पदाधिकारी बनाउने सहमति भएको छ । जसअनुसार अब कांग्रेसमा एक सभापति, दुई उपसभापति, दुई महामन्त्री , दुई सहमहामन्त्री र एकजना कोषाध्यक्ष रहने छन् । कोषाध्यक्ष बाहेक सबै महाधिवेशनबाट निर्वाचित हुनु पर्ने प्राधवधान राख्न सहमति भएको छ ।
....................