दीपिकाको ट्याटुको झन् चर्चा

मुम्बई – दीपिका पादुकोणले गर्धनमा बनाएको आरके लेखेको ट्याटु लामो समयदेखि चर्चामा छ। एकपटक उनले रणवीर कपुरका नाममा गर्धनमा खोपेको ट्याटु मेटाइएको चर्चा बाहिरिएको थियो। तर यो चर्चा केही दिनमै अफवाह साबित भयो । 

डिसेम्बर १२ मा इशा अम्बानीको बिहेमा सरिक भएकी दीपिकाको गर्धनमा आरके लेखिएको ट्याटु देखिएपछि उक्त हल्ला अफवाह साबित भएको हो। यसपटक उक्त ट्याटु पहिलेभन्दा केही रातो रङमा देखिएको थियो। उनी इशाको बिहेमा सरिक भएको एक भिडियोसमेत सार्वजनिक भएको छ। त्यसमा उनी आकर्षक देखिएकी थिइन्।

भिडियोमा दीपिकाको गर्धनमा आरके लेखिएको ट्याटुको हल्का झलक देख्न सकिन्छ। बिहेपछि मुम्बई एयरपोर्टबाट बेंग्लोर जाने क्रममा दिपीकाको गर्धनमा ट्याटु देखिएको थिएन। यसपछि बिहेभन्दा अगाडि ट्याटु हटाइएको हल्ला फैलिएको थियो। तर फेरि देखिएपछि उनले ट्याटु नहटाएको पक्का भएको छ।

अधिकांश समारोहमा दीपिका मेकअप गरी ट्याटु लुकाउँछिन्। उनले फिल्म सुटिङमा पनि ट्याटु लुकाउँदै आएकी छन्। 

एक पटक दीपिकाले ‘मैले कहिल्यै पनि ट्याटु हटाउन सोचेकी छैन र कहिले यस्तो योजना पनि बनाएकी छैन’ भनेकी थिइन्। ब्रेकअपपछि पनि दीपिका र रणवीरको राम्रो सम्बन्ध थियो। तर दीपिकालाई डिप्रेसन भएको थियो । त्यसपछि उनको जीवनमा रणवीर सिंहको आगमन भएको हो।