नेपालीलाई यूएईमा अलपत्र पार्ने मेनपावरलाई कारबाही गर्न सिफारिस

खोटाङ- संयुक्त अरब इमिरेट्स (यूएई) स्थित नेपाली दूतावासले वैदेशिक रोजगारीका लागि यूएई पुगेका नेपाली युवालाई अलपत्र पार्ने मेनपावरलाई कारबाहीका लागि सिफारिस गरेको छ।

यूएई पठाएर १९ नेपाली युवालाई अलपत्र पार्ने काठमाडौंस्थित मेची इन्टरनेशनल ओभर्सिज प्रालिलाई कारबाही गर्न दूतावासले वैदेशिक रोजगार विभाग ताहाचल, काठमाडौंलाई पत्राचार गरेको हो। 

'नेपाली श्रमिक समस्यामा परेको खबर विभिन्न सञ्चार माध्यमबाट थाहा भएपछि समस्या समाधान गर्न दूतावासले कम्पनी र मेनपावर एजेन्सीसँग सम्पर्क गर्दा हप्ता दिनभित्र समस्या समाधान गर्ने प्रतिबद्धता जनाएका थिए', श्रम सहचारी आविद अन्सारीले लेख्नुभएको पत्रमा भनिएको छ, 'तर अहिले पनि समस्या जस्ताको त्यस्तै रहेको तथा समस्या समाधानका लागि कुनै पनि पहल नगरेको देखिएकाले मेनपावर तथा कम्पनीलाई आवश्यक कारबाही गर्न आदेशानुसार अनुरोध छ।'

मेची इन्टरनेशनल ओभर्सिजका एजेन्टले क्लिनरको कामका लागि यूएईको नूर अल अफ्सा क्लिनिङ सर्भिसेस ईष्ट र यूनिक स्टार जेनेरल सेक्युरिटी गार्ड सर्भिसेसमा पठाएको तर, कामदार करारनामा अनुसारको काम, तलब र सेवा सुविधा नपाउँदा नेपाली कामदार अलपत्र परेको खबर चैत-१ गते सार्वजनिक भएको थियो।

कामदार करारनामा अनुसारको काम र पारिश्रमिक नपाउँदा खोटाङको जन्तेढुङ्गा गाउँपालिका-५ चिसापानीका पर्शुराम राई र राजकुमार राई (एकाघरको दाजु/भाइ) सहित १९ जना नेपाली अलपत्र परेको खबर चैत-२ गते सार्वजनिक भएको थियो। 

खोटाङ्गे दाजुभाइ (पर्शुराम दाजु र राजकुमार भाइ) सँगै अलपत्र पर्नेमा सुर्खेतका भविष्य जिसी, पाल्पा तिनाउका देवसिं सुनारी, नवलपरासीका सुनिल श्रेष्ठ, दैलेखका मनबहादुर शाही, धादिङका तिलकबहादुर सुनार, कपिलवस्तुका मनोज थारु, उदयपुर गाईघाटका किशोर खत्री, गुल्मी मुसिकोटका हिमाल सरतुंगे, कालीकोटका जितेन्द्र शाही, मोरङका करन सरदार, तेह्रथुमका लक्ष्मीप्रसाद दुलाल, झापाका मिश्रीलाल दास, सिन्धुपाल्चोकका खड्कबहादुर श्रेष्ठ, उदयपुरका मानबहादुर कार्की, गोरखाका आशबहादुर गुरुङ, मोरङका पदम नेपाल र नुवाकोटका लाक्पा तामाङ रहेका छन्।

खाने बस्ने सुविधासहित मासिक यूएई दिराम एक हजार एक सयदेखि एक हजार दुई सयसम्म तलब पाउनेगरी यूएई लगिए पनि खानासहित मासिक नौ सय दिराम र आफ्नै खाना खानेलाई मासिक १०० दिराम दिने व्यवस्था थियो। 

आफूहरुले एजेन्टलाई जनही एक लाख ९० हजारदेखि दुई लाख २० हजार रुपैयाँसम्म बुझाएर यूएई पुगेको उनीहरुले बताएका छन्। यूएईमा रहेका नेपालका सञ्जय थापा र भारतका नियासले अरु कम्पनीमा काम खोजेर केही दिन काम लगाउने, काम नभेटेसम्म कोठामै राख्ने गरेका थिए। नियमित काम नपाउने र कोठामा आफ्नै खाएर बस्नुपर्ने अवस्था देखेपछि युवा मिडियाको सम्पर्कमा पुगेका थिए। 

मेची इन्टरनेशनल ओभर्सिज प्रालिका अध्यक्ष राजकुमार चौधरीले सम्झौता अनुसारको सेवा सुविधा उपलब्ध गराउने ग्यारेन्टीका लागि फागुन-७ गते नूर अल अफ्सा क्लिनिङ सर्भिसेस ईष्ट र यूनिक स्टार जेनेरल सेक्यूरिटी गार्ड सर्भिसेजलाई पत्र पठाएका थिए। तैपनि कामदारको समस्या हल नभएको पीडितमध्येका पर्शुराम राईले बताउँदै आएका छन्। 

वैदेशिक रोजगार विभागले मेनपावरलाई लिखित जवाफसहित उपस्थित हुन चैत-६ गते निर्देशन दिएको थियो। कामदार करारनामा अनुसारको काम, तलब र सेवा सुविधा नपाएपछि आवाज उठाउँदै विभिन्न मिडियाको सम्पर्कमा पुगेका १९ युवालाई थापाले ‘आफ्नै गल्ती भएको उल्लेख गर्दै भिडियो र कागज’ बनाउन दबाब दिइरहेका छन्। 

अलपत्र युवाका अनुसार यूएईमा सम्झौता अनुसारको काम र दाम नपाई दुःख पाइरहेका कैयौँ नेपाली छन्। उनीहरुको हकहितमा आवाज उठाइदिने कोही छैनन्।

चार महिनादेखि आफूहरु यूएईमा अलपत्र पर्दासमेत नेपाल सरकारले कुनै चासो नदिएको भन्दै उनीहरु आक्रोशित बनेका छन्। राजकुमार फेब्रुअरी १० तथा पर्शुराम फेब्रुअरी २३ तारिख वैदेशिक रोजगारीको सिलसिलामा यूएई पुगेका हुन्। रासस