मेस्सीमा कस्ता छन् फुटबल गुण ?

एजेन्सी- बार्सिलोनाका कप्तानसमेत रहेका अर्जेन्टिनी सुपरस्टार लिओनल मेस्सीलाई विश्वकै उत्कृष्टमध्येका एक फुटबलर मानिन्छ । कतिपयले त उनको तुलना अर्जेन्टिनाकै लिजेन्ड डिएगो म्याराडोनादेखि ब्राजिलका लिजेन्ड पेलेसँग पनि गर्ने गरेका छन् । 

अनि कतिले मेस्सीलाई इतिहासकै सर्वकालीन महान् खेलाडीको उपमा दिन पछि पर्दैनन् । तर, यता पेलले भने मेस्सी एक पूर्ण खेलाडी नभएको बताउँछन् । उनले मेस्सी उत्कृष्ट खेलाडी रहे पनि उनीसँग एक फुटबलरमा हुनुपर्ने कौशलता नरहेको बताएका हुन् । 

पेलेले खेल कौशलका हिसाबले अर्जेन्टिनाका म्याराडोना मेस्सीभन्दा धेरै उत्कृष्ट रहेको पनि बताए । एक फरवार्डका हिसाबले मेस्सीसँग थुप्रै कुरा अभाव रहेको पेलेले बताए ।

‘मेस्सीसँग खालि एउटा मात्रै क्षमता छ । उनले सधैं एकै खुट्टाले मात्रै बल हान्छन् ।’ पेलेले भने, ‘उनले राम्ररी बल हेडिङ गर्न सक्दैनन् र उनमा फुटबलरमा चाहिने अन्य शारीरिक कौशलता पनि छैन ।’

पेलेले खेल शैलीका हिसाबले मेस्सीभन्दा म्याराडोना उत्कृष्ट रहेको बताए । म्याराडोनाले आफ्नो बेलमा आफूले पनि निकै फरक तरिकाले खेल्ने गरेको सम्झिए । पेलेले भने, ‘मैले बुझेसम्म म्याराडोना विश्वकै उत्कृष्टमध्येका एक हुन् । यदि तपाईं मलाई उनी मेस्सीभन्दा उत्कृष्ट हुन् भनेर सोध्नुहुन्छ भने अवश्य पनि, म्याराडोना मेस्सीभन्दा निकै उत्कृष्ट खेलाडी हुन् ।’